Campamento 2023, fecha y su rekisitonan

ORANJESTAD -   Relaciona cu Semana Santa caminda cu nos ciudadanonan tin e custumber di bay campa, Altocomisario di Polis Sr. Ramon Arhem ta haci un fuerte yamada na nos campadonan pa tene cuenta cu e condicionnan bao di cual ta otorga e permiso.

E fecha riba cual nos campadornan por cuminsa campa ta Diadomingo 2 april  2023 pa 12:00 di merdia. Kiermen riba e fecha y ora stipula ta permiti pa pone trailernan y tentnan riba nos beachnan.  Tur obheto cu pone prome cu e fecha y orario stipula polis lo kita.. E ultimo dia di campa lo ta dia 16 april 2023.

Despues di campamento mester kita tur obheto for di beachnan. Si esaki NO sosode polis lo kita esakinan riba gasto di e campador. Un yamada ta bay na un y tur pa mantene nos beachnan limpi. Deposita tur desperdicio den bari di sushi of den saconan di plastic.

Ultimo dia pa entrega peticion pa campamento ta diaranson 15 maart 2023 entre 8:00 pa 11:30 mainta y entre 1:00 pa 04:30pm

A añadi extra rekiisito na e permiso p’esey tene cuenta cu e siguiente condicion cu nos ta splica aki bao:

  1. Temporada di campamentoAriba e santo blanco na e beachnan bao ningun circumstancia ta wordo permiti pa haci B.B.Q., na otro sitio haci B.B.Q. solamente cu B.B.Q. pit di gas.
  2. Tent y trailernan cu ta wordo uza pa campa mester ta den bon condicion. Nan mester wordo poni por lo menos 10 meter for di canto di lama y nan mester pone por lo menos 5 meter for di e caminda publico. Si NO cumpli cu e regla aki, polis lo kitanan.
  3. Bao ningun forma ta permiti pa reserva tereno pa campamento.
  4. Tent, trailer y otro obhetonan cu ta uza pa campa no por wordo poni riba otro lugarnan cu ta e lugarnan cu ta destina  pa esakinan y di cual lugarnan ta destina pa Gobierno.
  5. Den e tentnan/trailernan mester tin suficiente recursonan pa loke ta trata dunamento di prome auxilio. (E.H.B.O.)
  6. Ta prohibi pa pone na tent/trailer, obhectonan of plachinan cu no ta cuadra cu moralidad.
  7. E campamento mester sosode conforme e condicionan bao di cual e permiso a wordo otorga.
  8. Ta prohibi pa core cu vehiculonan di motor, bicicleta, cabay y garoshi riba nos beachnan y principalmente na lugarnan caminda ta destina pa publico.
  9. Ta prohibi di pega candela riba nos beachnan.
  10. Ta prohibi di bende cuminda, softdrinks, mixdrinks, of cualkier otro tipo di articulo ariba beach sin permiso.
  11. Musica por wordo toca solamente for di den e trailer of tent den siman te 10:00 p.m y den weekend te cu mey anochi di tal manera cu no ta molestia otro campadornan. E uzo di sound system/emplifiers etc. ta permiti solamente si otro campadornan no ta sinti molester di esakinan.
  12. Ta prohibi pa kap mata, sin permiso.
  13. Ta prohibi pa core cu boto y pa ankra esaki den e zwemzone. Tambe ta prohibi pa mara boto na e boeinan cu ta destina pa scheepvaart.
  14. Ta prohibi uzo di pallet y carton riba beach. No cumpli cu e regla aki polis lo kita esakinan.
  15. Temporada di campamentoTa prohibi pa uza e beach of e palo di coconan como toilet.
  16. Ta prohibi pa tin cabay y cacho riba beach.
  17. Ta prohibi pa e campadornan uza e hutnan pa nan campa, nan ta wordo laga liber pa e personanan cu ta bin pasa dia.
  18. Bao ningun circumstancia mag di susha e beachnan. Boternan kibra of splinter di glasnan no mag di wordo laga atras riba beach, ni tampoco por tira esakinan den lama. Esaki ta conta pa desperdicio tambe.
  19. E permiso no mag di wordo pasa pa un otro persona.
  20. E poseedo di e permiso mester tin esaki den su tent/trailer na un caminda visibel pa polis.
  21. E poseedo di e permiso mester tene cuenta cu e tin solamente derecho riba e lugar di campa durante e tempo cu efectivamente e ta campando, prome cu esaki bo no mag di reserva, marca, pone cabuya ect.
  22. E poseedo di permiso ta keda responsabel pa cualkier daño na otronan debi na existencia di su tentnan/trailer of otro objeto.
  23. Indicacionnan di polis duna na interes di orden publico y seguridad di persona, bienes y basa riba moralidad mester wordo sigui estrictamente.
  24. Esun cu no actua conforme e condicionnan bao di cual e permiso a wordo otorga ta wordo considera di a actua sin permiso. E permiso eta wordo revoca y bo por haya un multa.
  25. Un recordatorio pa tur campadornan cu e ultimo dia pa haci peticion pa campa ta dia 15 maart 2023. Sigui tur reglanan y pasa un dushi temporada. Nos di Cuerpo Policial Aruba lo controla durante campamento na tur parti di nos isla.
Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options