Cambio di nomber di Commandeur Pieter Boer School pa Xander Bogaerts

Den presencia di dignitarionan, invitadonan, alumnonan, maestronan di scol y su famia  Xander Bogaerts a desvela e nomber nobo di Commandeur Pier Boer School cu ta hiba su nomber Scol Basico Xander Bogaerts.    

Xander Boogaerts tabata alumno di Commandeur Pieter Boer School y a keda masha emociona cu e homenahe ricibi  y a agradeci e scol  tur persona cu a apoye pa logra su meta. Den su speech tambe e ta conseha e alumnonan pa lucha pa nan soño pa e por bira realidad. E la conseha e muchanan desde di chikito scoge kico bo kier bira den futuro. Desde cu Xander tabata chikito e tabata kier a bira maesro di scol of pelotero. Ademas ta importante pa pone atencion ken ta bo amigonan, p’asina bo no desvia di bo meta.

Durante varios discurso su exmaestronan a describi Xander como un alumno ehemplar, bon deportista, alegre y cu bon manera. Awor como pelotero profesional e ta un berdadero rolemodel pa nos muchanan, como tambe pa nos comunidad.

Minister di Enseñansa, Ciencia y Desaroyo Sostenibel, dr. Rudy Lampe a hiba un discurso den cua e la gradici e muchanan pa nan atencion y disciplina y na e team cu e organisa e evento. Minister a referi na e hecho cu despues di 75 aña e momento a yega pa duna honor hustifica na un yiu di tera cu ta un ehempel y fuente di inspiracion y motivacion pa nos muchanan cu por logra metanan grandi den vida, como tambe pa e docentenan cu cada mainta ta yega na pia di trabao y sa di lo por 'nifica un diferencia den bida di e ser humano pa por realisa su soñonan y bira exitoso den bida.

Minister Lampe a referi na un poesia di e dramaturgo y poeta Aleman Bernholt Breght

"Ora un hende haci bondad durante 10 aña, nos ta yame bon hende. Si e persona ey haci bondad durante 30 aña, nos ta yame hopi bon hende. Si e persona a haci bondad durante henter su bida, nos ta bisa cu e persona ey a bira indispensabel pa humanidad."

Pesey ta importante pa un persona manera Xander sigui ta y keda un ehempel pa nos muchanan y asina ta un rolmodel indispensabel den e memoria colectivo di pueblo di Aruba.

Minister Lampe a lesa e ministeriele beschikking cu ta honra e cambio di nomber di e scol pa *Scol Basico Xander Bogaerts*.