Bunita intercambio cultural hubenil entre scolnan di baile Club di Movimiento Aruba y You Can Dance di Belgica

Esaki ta den cuadro di e culminacion di e proyecto intercambio cultural hubenil entre Aruba y Belgica. E lidernan di ambos scol di baile Samanta Westera-Juppa di Aruba y Marijke Dierick di Belgica a uni den e proyecto aki na bienestar di nan alumno pa asina motiva e hobennan pa practica nan pasion cual ta baile.E prome parti di e proyecto e alumnonan di Scol di Movimiento di Aruba a biaha pa Belgica y den e segundo parti e alumnonan di You Can Dance di Belgica a biaha pa Aruba, caminda a intercambia y siña di e bailenan cultural di ambos pais, como tambe historia, inovacion, sostenibilidad, idioma y crecemento personal. Ambos parti e proyecto tabata consisti di tayernan riba baile, actividadnan y un presentacion na final di cada proyecto.

E show na Belgica a tuma luga dia 2 di augustus y e presentacion na Aruba a tuma luga dia 11 di augustus ultimo. Minister di Cultura Xiomara Maduro tabata presente na Cas di Cultura y den su discurso a yama bon bini na Aruba tur esnan di You Can Dance studio y a gradici Erasmus + y Jint pa sostene y apoya e intercambio cultural entre e hobennan di Club di Movimiento Aruba Dance School y Dansstudio You Can Dance di Belgica.

E hobennan di Belgica y Aruba a comparti cu otro nan pasion pa baile, cera conoci cu historia y custumber di cada Pais y cera un bunita amistad cu otro, cual amistad lo por ta pa bida largo. E alumnonan a amplia nan conocemento y a gana hopi experencia.

Minister di Cultura a gradici scol di baile You Can Dance di Belgica pa nan hospitalidad pa nos alumnonan di Aruba y di otro banda tin e confiansa cu e alumnonan di scol di baile You Can Dance di Belgica a sinti nan mes aki na cas y cu e experencianan biba na Aruba lo ta inolvidabel.

Un danki special tambe na e docentenan. Ta spera cu den futuro lo por sigui organisa proyectonan asina di intercambio cultural cual ta oportunidad pa nos hobennan por siña conoce mas di culturanan di otro paisnan.

E publico na Cas di Cultura y esnan na Belgica via medionan social por a experencia un anochi magico caminda e alumnonan di ambos scol di baile a duna un excelente presentacion.