Bo kier ta periodista pa un dia

ORANJESTAD - Ministerio di Asuntonan General conhuntamente cu Ministerio di Asuntonan Social ta desea di enfoca riba e importancia di Prensa den un pais democratico.

Bo kier ta periodista pa un dia?Ta sumamente importante pa desaroyo sano di un pais pa sigui eleva e nivel di suministro di informacion.

P’esey, Gobierno di Aruba a dicidi pa duna enfoke na nos muchanan, nos futuro periodistanan, nos prensa di mayan. Pa medio di un proyecto “Periodista Pa 1 Dia”, lo duna espacio na nos muchanan pa cera conoci di un manera practico kico ta e trabou di un periodista y asina stimula e interes den nos muchanan pa studia den e ramo di Prensa Profesional.

Durante 5 siman nos Minister-President sra. Evelyn Wever-Croes, lo habri portanan di gobernacion pa un grupo selecta di nos muchanan di Aruba haci pregunta durante e conferencia di prensa hubenil.

Pa prome biaha nos muchanan lo haya oportunidad pa haci Minister-President pregunta en persona y haya contesta riba nan preguntanan. Muchanan di scol basico por registra online cu asistencia di un mayor of representante y haci tres pregunta di e mucha su interes a traves di e website www.specialprojectsaruba.org y despues cu a registra online lo ricibi automaticamente un email di confirmacion di inscripcion den inbox (of junk mail). Tambe por download e formulario, print e, yen’e, y entreg’e na Bestuurskantoor. Esnan cu e preguntanan mas interesante lo haya e oportunidad unico aki pa participa.

Ultimo fecha pa registra pa participa ta dialuna 22 di maart.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options