Bishita na Wonden Poli ta demostra con importante prevencion y hiba un bida saludabel

Dr. Yuri Casseres acompaña pa e director Sr. Vroegop a duna e minister un rondleiding. CAWC ta specialisa pa duna cuido na pashentnan cu tin heridanan cronico y complica, actualmente tin dos ubicacion esta na HOH y na ImSan. E nivel di cuido cu CAWC ta brinda ta di un nivel hopi halto cu e mihor materialnan riba mercado. E nivel di cuido di CAWC ta e mas halto den Caribe Hulandes, pa e motibo aki CAWC ta ricibi hopi pashent di entro otro Boneiro y Sint Maarten, aportando di e manera aki na nos turismo medico.

CAWC ta trata alrededor di 400 pashent pa luna y ta duna consulta na mas o menos 1500 persona pa luna, pa aña ta duna alrededor di 17 mil consulta na HOH. Segun proyeccionnan haci pa HOH si sigui mescos pa aña 2024 e consultanan lo aumenta te cu 25 mil pa aña.

Gran parti di e pashentnan cu CAWC ta ricibi ta pashentnan cu ta surfi di diabetes. Diariamente ta trata herida di pashentnan diabetico. Pa e motibo aki e plan nacional di prevencion ta hopi importante mirando cu hopi di e pashentnan ta diabetico. Hopi di e pashentnan aki a perde nan dedenan of te hasta nan pia. Amputacion ta baha e calidad di bida di pashent.   

Minister Dangui Oduber a anuncia 22 di april lo bay lansa e “Aruba Healthy Lifestyle Center”. E centro aki lo bay enfoca riba personanan cu tin sobre peso y cu ta cay den e grupo di risico pa haya non-communicable disease (NCD), manera diabetes. Tur esaki ta den cuadro di e plan nacional di prevencion.

Gobierno ta keda enfoca riba e plan nacional di prevencion pa sigui conscientisa y informa e comunidad den hiba un bida mas saludabel. Ta mira con e gastonan di AZV ta sigui subi, e problemanan ta bira mas grandi y e desafio ta bira mas grandi pa hospital. Pa e motibo aki tabata tin un diferencia di opinion cu Hulanda den e cortamento di e 60 miyon den AZV.Ta importante e ta pa sigui haci inversionnan den cuido, den caso di CAWC un recorte den cuido tin un efecto considerabel.

Minister Dangui Oduber ta gradici Sr. Vroegop y Dr. Casseres pa e invitacion, alabes ta elogia Dr. Casseres y henter su team pa e tremendo trabou y servicio cu nan ta brinda.