Bishita di Sociaal-Economische Raad (SER)

SER ta un organo consultativo independiente estableci pa ley, cu ta duna conseho solicita of no solicita -gevraagd of ongevraagd advies- na Gobierno di Aruba riba e temanan di mayor importancia riba tereno socio-economico. Pa medio di consulta  mutuo, intercambio di opinion y argumentacion, e organo consultativo ta tuma decisionnan referente e contexto, contenido y forma di consehonan, rapportnan di investigacion y notanan cu ta wordo presenta na gobierno riba maneho socio-economico.

E constelacion di SER ta consisti di un maximo di 9 representante di cual 3 representante di organisacionnan di dunado di trabao, 3 representante di organisacionnan di empleadonan y 3 experto independiente. Cada miembro tin un miembro suplente cu durante su ausencia lo ta su reemplasante durante reunionnan.

Pa e periodo di 2022 pa 2024, e constelacion ta consisti di e siguiente miembronan:

Pa loke ta trata representantenan di organisacionan di dunadornan di trabao:

• Sr. Tristan Every y miembro suplente Sr. Ronnie van Trigt di ATIA;
• Sr. Maarten Jan van Romondt y miembro suplente sra. Maura Brown di AHATA;
• Sra. Monica Kock y miembro suplente sra. Lay Hing de Kort- Yee di KvK.

Pa loke ta trata representantenan di organisacionan di empleadonan:

• Sr. Hose Figaroa y miembro suplente sr. Hubert Dirksz pa FTA;
• Sra. Josefina Albertus y miembro suplente sr. Anthony Figaroa di SIMAR;
• Sr. Leonard Kelly y miembro suplente sr. Alonso Tromp di TOPA.

Pa loke ta trata expertonan independiente y area di expertisio, e siguiente personanan lo forma parti di SER:

• Sr. Ben Marapin. Area di expertisio: economia y finanzas;
• Sra. Christie Mettes y miembro suplente sra. Francielle Laclé. Area di expertisio: desaroyo sostenibel;
• Sr. Stanley Heinze. Area di expertisio: Salubridad Publico y Asuntonan Social;

Minister di Asuntonan Economico, Comunicacion y Desaroyo Sostenibel, Geoffrey Wever ta desea e constelacion nobo di SER exito cu e tarea importante aki. SER su consehonan, rapportan di investigacion y notanan ta instrumentonan esencial y cu balor agrega pa e proceso completo di maneho y asina tambe riba desaroyo di Aruba.