Bishita delegacion UNICEF na Aruba

Manera ta conoci, Gobierno di Aruba a traha un Crisis Plan Social. Den e plan aki a aloca 32 miyon florin pa cuminsa atende cu e problemanan social. E siguiente paso tabata pa busca asistencia di organisacionnan internacional pa yuda. Premier Evelyn Wever-Croes a biaha pa New York casi dos luna pasa pa representa Reino na Nacionan Uni y a reuni tambe cu Unicef.

Despues di e reunion cu UNICEF, a haci tramitenan, y dos siman pasa UNICEF a bin Aruba pa haci un assessment si nan por yuda y con. Nan a presenta nan conclusionnan preliminar na Gobierno di Aruba, y dentro di poco lo manda e relato final.

Siman pasa prome Minister mr. Evelyn Wever-Croes a ricibi e delegacion di UNICEF. Nan a duna un relato di cual ta e aspectonan cu Aruba mester mehora pa protehe nos muchanan miho.   Prome Minister ta hopi satisfecho cu a logra convence Unicef pa bin Aruba asina lihe y cu nan ta dispuesto den yuda Aruba pone tur energia hunto pa traha na bienestar di nos muchanan.