A tuma mas o menos un aña pa renoba e edificio di biblioteca na San Nicolas. Biblioteca a muda bek december ultimo. Pa duna atencion na e hecho aki y gradici tur compania y persona cu a coopera cu e proyecto grandi aki a organisa un reapertura.
Esaki a bay den forma di un brindis cu un programa special pa empleado y invitadonan. Minister di Enseñansa, Ciencia y Desaroyo Sostenibel, sr. A. R. Lampe, Minister President sra. Evelien Wever-Croes, Vice presidente di Parlamento, sr. Alan Howell, amigonan di biblioteca y miembronan di prensa a honra cu nan bishita.
Sr. Gregory Richardson a guia e programa di e anochi festivo cu bunita palabra, declamacion di un poema y expresion di speransa pa biblioteca sigui di ta un inspiracion pa miembronan di comunidad di San Nicolas.
Oradornan a conta kico biblioteca di San Nicolas a nifica pa nan y un poco di nan bon recuerdonan pasando tempo na biblioteca.
Biblioteca Nacional Aruba su departamento Audiovisual a presenta tres info-docu cu sr. Tito Bolivar (AAF), sr. Leo Bèrènos (amante di historia) y sr. Judith Ling, coordinadora di Biblioteca San Nicolas.
E facilidad a haya un bachi nobo y ta opera optimal atrobe Tin computer na disponibilidad di un y tur, un departamento Hubenil cu tin actividad pa mucha tur diaranson atardi 3or y un coleccion grandi di buki pa mucha. Den coleccion di adulto tin un cantidad di buki nobo, hopi atractivo.
Biblioteca ta habri pa comunidad di San Nicolas, Savaneta y becindario. Esaki diariamente di 8or pa 5or y dos dia den siman te 7or di anochi.
Gerente di Biblioteca Nacional Aruba ta invita tur miembro y bishitante pa sigui haci uzo di e servicio di biblioteca di comunidad
\
Share this page