Biahero cu paspoort Hulandes mester aplica pa visa ora di drenta Merca si a bishita Cuba

ORANJESTAD - Recientemente Directie Buitenlandse Betrekkingen (DBB) a ricibi notificacion di casonan unda cu U.S. Customs and Border Protection (CBP) a revoca e Electronic System for Travel Authorization "ESTA" di algun biahero.

Desde 12 di Januari 2021, U.S. Department of State, a categorisa Cuba como un State Sponsor of Terrorism (SST), y a introduci cambio den rekisitonan pa paisnan participante na e Visa Waiver Program (VWP) ora di realisa biahe pa Cuba. E cambionan aki ta aplicabel tambe pa personanan cu tin paspoort Hulandes y otro paisnan Europeo. Biaheronan cu a biaha pa Cuba sea riba of despues di 12 januari 2021 no ta bin na remarca pa drenta Merca haciendo uzo di e ESTA mas, sino mester aplica pa un U.S. visa na e consulado Americano. Si purba drenta Merca cu un ESTA despues di a bishita Cuba, e biahero ta core e riesgo cu autoridad Mericano lo revoca e ESTA y perhudica e biahero den su biahe.

Excepcion (limita) ta conta pa biaheronan cu ta biaha pa motibo diplomatico, trabao oficial, of cu proposito militar.

Por aplica pa un U.S. visa na e consulado di mas cerca cual ta na Corsou. Den e caso cu ta desea pa realisa un biahe combina pa tanto USA y Cuba, e persona mester haci un peticion pa un visa separa na un embahada of consulado di ambos pais prome cu sali di biahe. Esaki ta conta tambe pa vuelonan di transito y biahenan crucero cu ta pasa via Cuba.

Si ta desea mas informaciĆ³n, por acudi na e siguiente websites:

  1.  www.nederlandwereldwijd.nl/reisadvies/Aruba (bou di reischeck list);
  2. www.nederlandwereldwijd.nl/reisadvies/verenigde-staten-van-amerika (reizen en vervoer);
  3. www.cbp.gov

DBB ta pidi tur biahero cu un paspoort Hulandes (of Europeo) pa tene cuenta cu e cambionan pa evita situacionnan indesea durante biahe.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options