Dit item is gearchiveerd op 05-05-2022.
ORANJESTAD – Riba 2 di april ta Dia Mundial di Conscientisacion di Autismo. Anualmente riba e dia importante aki, varios organisacion rond mundo ta cende luznan blauw na nan edificionan, ciudadanonan ta bisti na blauw y ta organisa eventonan special pa hunto crea conscientisacion y duna atencion na autismo.
Gobierno di Aruba y Fundacion Autismo Aruba (FAA) diasabra anochi un biaha mas y pa varios aña ta uni na e causa special aki y ta ilumina bestuurskantoor cu luznan blauw. Despues di un ceremonia cortico na unda cu Prome Minister Evelyn Wever-Croes y Presidente di FAA señora Carolina Thiel-Span a duna un discurso cortico sigui pa presentacionnan di dos hoben cu autismo. Kay Quandus a trece un bunita poesia y Byron Lesire a introduci su mes y su retonan como un mucha cu autismo. Ambos ta hobennan talentoso cu autismo.
Despues di e ceremonia, Prome Minister, Ministernan Rocco Tjon y Endy Croes, miembronan di FAA y muchanan a ilumina Bestuurskantoor cu luznan blauw. Hunto nan a “Light it up blue.”
Den su discurso Prome Minister a indica cu Nacionnan Uni den nan reunion anual pa e Dia di Autismo lo trata e topico di enseñansa inclusivo y di calidad pa un y tur. Den e contexto aki, ta describi den e Sustainable Development Goal (Meta di desaroyo sostenibel 4). SDG 4 ta enfoca riba enseñansa.
Gobierno di Aruba ta trahando den ekipo cu expertonan den diferente ramo pa percura pa Aruba tambe yega na realisacion di e ideal di e SDGs. Hunto cu partnernan den enseñansa Gobierno ta trahando duro pa provee enseñansa di calidad, inclusivo y accesibel pa un y tur.
Share this page