HomeActualidadNoticiaBBO na frontera NO tin efecto riba canasta basico

BBO na frontera NO tin efecto riba canasta basico

ORANJESTAD - Departamento di Asunto Economico, Comercio y Industria (DEACI) ta informa cu  introduccion di BBO na frontera  entrante 1 di augustus 2023 no tin  efecto di aumento riba e prijsnan  pa productonan cu ta pertenece na e “Canasta Basico”.

E canasta basico actual ta consisti di e siguiente 22 categorianan di producto:

Canasta Basico
1. Aros 12. Bonchi preto, seco
2. Hariña di maishi 13. Salmon, den bliki, den awa
3. Te 14. Sardin, den bleki, den awa
4. Koffie 15. Tuna fish, den bleki, den awa, chunk/flaked/grated
5. Lechi pa baby 16. Spinashi, frozen
6. Cuminda di baby 17. Mixed vegetables, frozen
7. Azeta pa cushina 18. Broccoli, frozen
8. Lechi polvo 19. Havermout
9. Lechi likido pa koffie 20. Spaghetti
10. Bonchi cora, seco 21. Harña all-purpose
11, Bonchi Lima, seco 22. Lechi likido duradero den tetrapak 

DEACI ta tene cuenta cu e productonan den nan forma mas basico di cada categoria, sin smaak of ingrediente adicional. A base di informacion di factura y gasto di transporte obteni (segun e landsbesluit invoervegunning goederen), y un margen limita pa mayorista y detayista, DEACI ta calcula prijs pa cada producto individual pa diferente marca y contenido. Ta publica e cambionan calcula den e lista di prijs y anuncia esakinan cada 2 siman den Landscourant. E lista actual ta disponibel riba e App ‘Control di Prijs’.  E App ‘Control di Prijs’ ta disponibel pa download riba GOOGLE PLAY pa android devices y APP STORE pa Apple devices.

Controladonan di DEACI ta eherce control diario riba e prijsnan regula na supermercado. E autonan cu ta haci e control akinan ta D281, D381 y D382.

Banda di e canasta basico, DEACI ta publica tur siman e ‘Macuto di Compras’ riba  e website: www.deaci.aw y riba pagina di Facebook di Departamento di Asunto Economico. E ‘Macuto di compras ta un observacion di prijs di producto no regula den diferente supermercado.  E productonan aki no tin prijs maximo di parti di gobierno. E ‘Macuto di Compras’ ta indica e consumidor cual supermercado ta bende cierto producto na mihor prijs.

DEACI ta encurasha tur consumidor pa haci uzo di e App “control di prijs’ y tambe di e informacion di ‘Macuto di Compras’ pa haci  compras mas consciente di e prijsnan. Pa pregunta, keho of iregularidad, por haci uzo di e app y e numbernan di telefon menciona den e app of mail Departamento di Asunto Economico: info@deaci.aw.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options