Banco Central di Aruba ta lansa oficialmente e serie nobo 2019 di biyetenan di florin

Durante e evento aki, e Presidente di BCA, Jane Semeleer, a duna un presentacion di e trayectoria di BCA pa realisa e serie nobo 2019 di biyetenan di florin. Despues, señora Miriam Gonzalez, Directora Ehecutivo, y señora Penelope Tromp-Gomez, Manager di Division, a elabora riba e temanan escogi pa e serie nobo 2019 di biyetenan di florin, como tambe riba e caracteristicanan di siguridad. Durante e trayectoria aki, BCA a traha hopi di cerca cu diferente artista local, varios experto local y internacional di banconan central y asesornan di sector priva, como tambe e productor di biyete internacionalmente renombra, esta Crane Currency. BCA a expresa su gratitud y a presenta un muestra chikito di aprecio na e colaboradornan presente. Despues señora Semeleer a invita señora mr. Evelyna Wever-Croes, Minister President di Aruba, y señora mr. Xiomara Ruiz-Maduro, Minister di Finansas, Asunto Economico y Cultura, pa conhuntamente desvela e diseñonan di e serie nobo 2019 di e biyetenan di florin.

Tema principal di e biyetenan ta “Bida na Aruba”, cu ta contene elemento di e flora, fauna, herencia cultural, monumentonan  y lugarnan prominente di Aruba. Banda cu e diseñonan ta hopi colorido, e biyetenan ta contene tambe e caracteristicanan di siguridad mas avansa disponibel riba mercado. Cu introduccion di e serie 2019 di biyetenan di florin, BCA tin como obhetivo pa mantene e confiansa den e florin y contribui na  promocion di e caracter unico y beyesa di Aruba su flora, fauna, herencia cultura, monumentonan y lugarnan prominente. Pa e futuro generacionnan por tambe sigui aprecia nan, ta di suma importancia pa sigui conscientisa nos comunidad pa preserva y conserva nan na un forma adecua.

Cronologia di emision di e serie nobo 2019 di e biyetenan di florin ta lo siguiente:

• 3 di juni 2019 - Emision oficial di e serie nobo 2019 di biyetenan di florin
• 4 di juni te cu 11 di augustus 2019 - Co-circulacion di e serie di 2003 y e serie nobo di 2019 di biyetenan di florin (10 siman)
• 12 di augustus 2019 - E serie 2003 di biyetenan di florin ta sali for di circulacion y no por uza nan mas pa haci pago
• 4 di juni te cu 4 di december 2019 - Por haci e cambio di e serie di 2003 pa e serie nobo di 2019 di biyetenan di florin solamente na e banconan comercial (6 luna)
• 5 di december 2019 te cu 12 di augustus 2049 - Por haci e cambio di e serie di 2003 pa e serie nobo di 2019 di biyetenan di florin solamente na e BCA (30 aña).

Den e lunanan venidero, BCA lo tene campañanan di informacion extensivo via di varios canal di comunicacion, manera corant, radio, television y BCA su Facebook, Instagram y website p’asina duna e publico e informacion mas importante di e serie nobo 2019 di e biyetenan di florin. Ademas, BCA lo tene sesionnan di informacion pa gruponan selecta y lo tin material informativo disponibel na e MFAnan, biblioteca nacional, scolnan, oficinanan di post, y banconan comercial. Pa loke ta trata e sesionnan informativo, BCA lo publica e dianan, horario, y lugarnan den corant, como tambe riba BCA su Facebook, Instagram, y website.

Fuente: www.cbaruba.org