Banco Central di Aruba ta anuncia emision oficial di e serie nobo 2019 di biyetenan di florin

Entrante 4 di juni 2019, e serie nobo 2019 di biyetenan di florin ta obtenibel pa publico na tur banco comercial pa por haci pago cu nan. E cronologia di e emision di e serie nobo 2019 di biyetenan di florin ta manera ta sigui:

• 3 di juni 2019 - Emision oficial di e serie nobo 2019 di biyetenan di florin
• 4 di juni te cu 11 di augustus 2019 - Co-circulacion di e serie di 2003 y e serie nobo 2019 di biyetenan di florin (10 siman)
• 12 di augustus 2019 - E serie 2003 di biyetenan di florin ta sali for di circulacion y no por uza nan mas pa haci pago
• 4 di juni te cu 4 di december 2019 - Por haci e cambio di e serie di 2003 pa e serie nobo di 2019 di biyetenan di florin solamente na e banconan comercial (6 luna)
• 5 di december 2019 te cu 12 di augustus 2049 - Por haci e cambio di e serie di 2003 pa e serie nobo 2019 di biyetenan di florin solamente na BCA (30 aña)

Cu e introduccion di e serie nobo 2019 di biyetenan di florin, BCA tin como meta pa mantene e confiansa den e florin Arubano y contribui na e promocion di e caracter unico y e bunitesa di Aruba su flora, fauna, herencia cultural, monumentonan y lugarnan prominente. Pa nos futuro generacionnan por tambe sigui aprecia esakinan, ta di gran importancia pa continua cu e promocion di conscientisacion publico pa por preservera y conserva esakinan na un forma adecua. Den e lunanan venidero, BCA lo sigui cu campañanan extensivo di informacion via e diferente medionan di informacion, entre otro corant, radio, television, BCA su Facebook y Instagram y tambe website, pa asina por provee e publico cu e informacion importante di e serie nobo 2019 di biyetenan di florin. Ademas, BCA lo tene sesionnan di informacion pa gruponan specifico, y lo pone material di informacion obtenibel na tur MFA, biblioteca nacional, scolnan, oficinanan di post, y banconan comercial. Pa loke ta trata e sesionnan di informacion, BCA lo publica e fecha, ora y lugar den tur corant, como tambe riba su Facebook y Instagram y website  www.cbaruba.org.

Fuente: www.cbaruba.org