Banco Central: conocemento financiero ta hopi abou (gearchiveerd)

Otronan ta biba cu un peso demasiado grandi di debe, mas o menos 35,9% di esnan cu a participa na e encuesta ta gasta mas si loke nan ta gana. Otronan facilmente ta cay pa e promocionnan atractivo pa haci un fiansa cu un interes abou. En bes di spaar pa ora un aparato den cas daña, ta haci uzo di credito pa busca un aparato nobo, pagando asina mas placa.
Cu e investigacion Banco Central kier a evalua e nivel di conocemento y educacion financiero di e pueblo y tambe yuda Banco Central haya e hermentnan necesario pa por formula un maneho efectivo cu por contribui na mehora e nivel di conocemento financiero na Aruba.

“Consumidornan mester por sa te con leu nan por haci uzo di e productonan financiero sin hinca nan mes den problema” segun gerente di departamento di Investigacion di Banco Central Jorge Ridderstaat.
Pa e investigacion a evalua diferente nivel di e conocemento financiero: conocemento di cifra/matematica,  concepto economico basico pa por tuma un decision ora di cumpra un cas, compronde e diferente tipo di interes manera interes comprimi y interes efectivo, caracteristicanan di e productonan financiero, manera e risico financiero pa evita cu un persona ta paga di mas of cu e lo no por paga despues. Tambe a evalua e conocemento di e personanan tocante nan derechonan y debernan.