Ban Combati Cancer di Tripa

Den cuadro di e luna aki,  Minister di Salud Publico Sr. Dangui Oduber kier informa y conscientisa e comunidad di Aruba tocante cancer di tripa. Esaki ta den cuadro di maneho di gobierno basa riba e parti di prevencion. Tin un plan nacional di prevencion di malesanan NCD’s cu varios stakeholders conhuntamente cu PAHO ta forma parti di dje.

Cancer di tripa ta un di e cancernan mas comun rond mundo. Den caso di Aruba e ta keda den e top 5 di e cancernan mas diagnostica. Cancer di tripa ta uno cu ta cuminsa den e pancreas, cual ta e organo na e parti patras di e persona su stoma, esta su parti digestivo. E luna di maart e mensahe ta #letsbeatcoloncancer “ban combati cancer di tripa”.

Den cancer di tripa no tin claridad e motibo kico ta caus’e, pero un persona por traha riba minimalisa e risico pa keda diagnostica. Pa por detecta esaki, ta sumamente importante pa controla e tipo di af (pupu) durante bo bishita na baño. Si bo ta nota sanger, slijm of un iregularidad ta consehabel pa consulta cu bo dokter di cas. Den caso di persona cu tin historia familiar di cancer di tripa semper ta bon pa comunica esaki cu bo dokter di cas.

E factornan cu ta pone un persona den risico halto pa haña cancer di tripa ta:

• Uzo di tabaco
• Obesidad
• Persona diabetico
• Problema di tripa cronico (inflamacion)
• Traha den un area unda bo ta exponi na cierto kimico

Mas bo edad subi mas bo risico pa wordo diagnostica cu cancer di tripa por aumenta. A base di investigacion ta splica cu den mayoria caso un hende homber por wordo diagnostica cu mas frecuencia cu un hende muher. E motibo pa esaki ta door cu hende homber tin mas probabilidad pa consumi productonan cu tabaco compara cu hende muher.

Pa e motibo aki, prevencion ta esencial. Pa hende muher y hende homber mester tin un balance den nan bida. Un punto importante ta nutricion. Den luna di maart tin diferente tema cu ta toca e topico di come mas saludabel, pa yuda preveni malesnan cronico. Pa cancer di tripa esaki tambe ta e caso, comemento di berdura, fruta, y bebe hopi awa ta yuda cu digestion.

Minister Oduber ta keda enfatisa na comunidad pa sigui educa nan mes den area di movecion, nutricion y yuda otro nan den e oportunidad pa por biba un bida mas saludabel. Hibando un bida mas saludabel nos por preveni malesanan di cancer, entre otro cancer di tripa.