E lema di e aña aki ‘ Union ta e forsa di nos baranca tan stima’.
Festival ‘Un Canto pa Aruba su Himno y Bandera
Riba 10 y 11 di maart di maart CCDN hunto cu Comision Pro Cultura ta organisa e festival ‘Un Canto pa Aruba su Himno y Bandera’, categoria di mucha y hoben riba Plaza Libertador G.F. Betico Croes. Lo bay tin un total di 40 participante y 13 agrupacion musical. Alumnonan di Colegio Sagrado Curason y Sint Aloysius School lo presenta e Himno di Aruba. Riba 12 di maart Aruba lo por gosa di varios composicion nobo den e festival ‘Un Canto Pa Aruba su Himno y Bandera’ categoria adulto, cu ta wordo organisa hunto cu Fundacion Cultural di Festivalnan Folklorico. Lo bay tin un total di 23 participante y 13 agrupacion musical. Tur e tres anochinan aki lo tin mas di 40 tent di cuminda crioyo, cos dushi y artesania local.
Poeta di Patria
Dia 15 di maart tin e evento di poema dedica na Aruba, Poeta di Patria den Cas di Cultura. E tema pa e aña aki ta 'Aruba' y e anochi aki e participantenan lo trece nan inspiracion y creacion dedica na Pais Aruba den idioma Papiamento. Entrada pa e evento Poeta di Patria ta gratis y ta cuminsa for di 7 or di anochi.
Manifestacion Cultural
Dia 17 di maart lo tuma luga Manifestacion Cultural na Plaza Libertador G.F. Betico Croes cu lo cuminsa pa 6 or di atardi cu Feria di benta di cuminda, cos dushi y artesano. Lo presenta Academia Musical Harpa y Cuarta bou encargo di Edgard Kelkboom y pa 8 or e programa oficial ta cuminsa cu discurso di Minister di Cultura, sigui pa un show cultural di canto, baile, poesia y musica di un orkesta bou encargo di e talentoso Chris Kross. E anochi lo finalisa cu un presentacion di Musical Time.
Acto Protocolar
Dia 18 di maart riba Dia di Himno y Bandera, Pueblo ta keda invita pa e Acto Protocolar riba Plaza Libertador G.F. Betico Croes na unda cu Minister President Wever-Croes lo hiba discurso sigui pa un Aubade. E mainta aki ta cuminsa 8or y mey cu coro musical forma pa muchanan di Scol di Colegio Laura Wernet Paskel, Colegio San Hose y Maria School, cu ta wordo reforsa pa Coro Tutti Frutti y acompaña musicalmente pa Caribbean Combo di Scol di Musica Rufo Wever.
Desfile di gruponan uniforma
Despues di e parti protocolar ta sigui e desfile di nos gruponan uniforma di scout, gubernamental, deportivo y cultural pa clausura e celebracion na Dia di Himno y Bandera na Plaza Libertador G.F. Betico Croes.
Concurso escolar
CCDN a prepara tambe un concurso escolar di pintura pa tur scol preparatorio y basico participa. E tema ta e 6 districtonan di Aruba, Oranjestad, Noord, Paradera, Santa Cruz, Savaneta y San Nicolas. Muchanan mester uza nan fantasia y creatividad pa pinta kico pa nan ta haci cada districto special. Mester entrega e pintura bek na scol y na scol mes lo scoge e miho pintura di cada klas y entrega esaki na CCDN. CCDN hunto cu un comision di maestro lo scoge un ganador di cada categoria. Lo tin premio pa Scol Preparatorio y Scol Basico pa klas 1 y 2, klas 3 y 4, klas 5 y 6.
Kibra Coco
E biaha aki tambe lo tin un 'Kibra Coco' pa asina e muchanan por haya sa mas di Aruba. Riba e pintura di e concurso nacional, lo tin un QR Code cu cual e muchanan hunto cu nan famia por participa contestando pregunta relaciona cu e simbolonan nacional di nos Pais. E famia cu contesta mas lihe y tin mas pregunta bon contesta ta gana premio.
Video Kico nos ta gusta mas di Aruba?
CCDN a prepara e concurso 'Kico nos ta gusta mas di Aruba' pa crea un movecion di cual tur scol preparatorio y basico por traha y manda un video di 30 seconde maximo pa mustra kico nan ta gusta mas di Aruba. Hunto cu nan docente lo por traha un video grabando cu un celular un bunita mensahe di nan klas ‘Kico nan ta gusta mas di Aruba.' Pa e video cu miho creatividad y mensahe lo tin un premio pa e klas.
Gradicimento
Minister di Cultura y CCDN ta gradici tur instancia y persona cu ta aporta pa haci e celebracion di nos Dia di Himno y Bandera uno digno di Pais Aruba, e.o. esnan gubernamental, Departamento di Cultura, KPA, DOW y IBISA, masha danki pa nan cooperacion. Ta gradici specialmente nos companianan estatal SETAR NV, Utilities Aruba NV, WEB Aruba NV y NV Elmar Aruba y tambe UNOCA, pa nan contribucion pa yuda engrandece e celebracion di Dia di Himno y Bandera 2023.
Share this page