Aviso di precaucion pa calor excesivo

ORANJESTAD – Riba 31 di augustus 2022, Servicio Meteorologico di Aruba a emiti un aviso di precaucion pa calor excesivo.

Aworaki nos ta den e temporada di aña cu lo bay sinti mas calor cu normal. Ta trata di e lunanan di september y october. Combinacion di temperatura halto y porcentahe halto di humedad, ademas di un biento menos fuerte cu normal lo pone cu por sinti malestar.

Aviso pa calor excesivoE temperaturanan maximo di e siguiente lunanan lo por oscila di 34°c (93 f) pa 36°c (97 f). Porcentahe di humedad den 85 te 90% of mas lo contribui na un indice di calor (temperatura aparente) rond di 40°c (104 f) te 46°c (115 f) cada dia. E calor y humedad halto lo no baha mucho anochi cu temperatura bahando solamente te un minimo di 28°c (82 f) te 29°c (84 f). Esaki lo aumenta e peligro p’e hendenan cu no por haya un luga adecua pa refresca nan curpa.

Calor excesivo ta e asesino di tempo number 1. Hende mester ta prepara pa e peliger cu calor excesivo ta ocasiona. Mucha chikito, hende grandi y hende cu malo di curason ta esunnan mas expone. Limita actividad pafo di cas pa ora trempan di mainta of ora solo baha. Si bo tin un airco cu ta funciona uz’e of por lo menos habri bentana pa laga aire pasa y circula.

Accion di precaucion

Aviso pa calor excesivoUn aviso pa calor excesivo ta significa cu ta spera un periodo di temperatura halto. E combinacion di temperatura y humedad halto lo combina pa crea un situacion den cual enfermedad causa pa exposicion prolonga na temperatura halto lo por presenta.

Ta recomenda pa:

  • bebe hopi likido (awa of juice sin sucu);  
  • keda den camber cu airco;
  • aleha for di solo;
  • bisti paña di color licht, preferiblemente blanco.
Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options