Atlas Social di Aruba parti 2 – Censo2020 E diversidad social y demografico di Aruba

ORANJESTAD - CBS ta anuncia e publicacion di e di dos parti di e Atlas Social di Aruba cu a traha a base di datonan colecta durante di Censo 2020.

E mapanan aki ta ilustra e diversidad social y demografico na Aruba y ta forma parti di un serie di publicacion nan cu lo wordo haci disponibel den un formato digital.

Mapa di ArubaE mapanan ta ilustra visualmente e indicatornan di distribucion social, economico y demografico di pais Aruba. Hasiendo uzo di tecnologianan nobo, pa prome biaha e Atlas Social ta disponibel den e formato digital y interactivo.

E datonan ta wordo presenta como un storia y ta duna e usuario e oportunidad pa scohe e mapa cu e kier bishita di e lista di mapa cu ta parece na comienso di e Atlas Social.

Na cada mapa por lesa un discripcion cortico cu ta consisti di un texto corto y un grafico. Usuarionan por scohe tambe pa download e tabelnan y graficonan cu ta pertenece na cada mapa.

E di dos grupo di mapanan cu CBS ta presenta ta e mapanan di Poblacion cu ta trata e caracteristicanan general di nos poblacion manera:

  • Poblacion segun tipo di hogar:
  • Hogarnan nucleo;
  • Un hogar nucleo ta un hogar cu ta consisti di un solo famia;
  • Hogarnan extendi y composita;
  • Un hogar extendi ta un hogar unda tin mas famia ta biba hunto unda tur miembro di hogar tin un relacion familiar cu otro.

Atlas Social di Aruba parti 2Un hogar composita ta un hogar unda tin mas famia ta biba hunto unda no tur miembro di hogar tin un relacion familiar cu otro.

  • Hogarnan cu ta consisti di 1 persona;
  • Poblacion cu no a nace na Aruba;
  • Poblacion cu no a nace na Aruba y cu a bin biba na Aruba prome cu 1986;
  • Poblacion cu no a nace na Aruba y cu a bin biba na Aruba despues di 1986;
  • Personanan di 14 aña of mas cu ta casa;
  • Personanan di 14 aña of mas cu ta biba cu otro riba base duradero (no casa);
  • Cantidad averahe di yiu pa hende muhe entre 14- 49 aña di edad.

E mapanan di Aruba ta wordo dividi den 55 zona y 8 region. Si un usuario kier haya mas informacion di un region of zona, e por click riba esaki y un “pop-up window” lo habri cu informacion tocante e zona of region scogi pa aña 2010 y 2020.

Logo Censo 2020Aruba ta un isla chikito cu un superficie total di 180 km2 y cu un poblacion cu tabata consisti di 108,166 persona na 1 di october 2020 (durante e conteo di Censo 2020).

E mapanan ta mustra cu aunke Aruba ta un isla chikito den tamaño, tin diferencia entre zonanan y regionnan pa locual ta trata caracteristicanan social y demografico di e poblacion.

Pa un planificacion regional efectivo y optimal ta importante pa por indica y ilustra e caracteristicanan di cada zona y cada region.

E link pa e Atlas Social ta:
Mapping Census 2020: Social-Demographic Diversity in Aruba 2 (arcgis.com)

E mapanan ta disponibel riba nos website www.cbs.aw y por haya nan bou di e tab di ‘Census2020’.

CBS ta trata di publica datonan pa nos poblacion den un manera mas atractivo pa lesa y compronde. CBS ta spera cu e publicacion aki lo yuda esnan encarga cu planificacion regional cu nan trabou y tambe provee e publico en general cu un mihor comprendemento di e desaroyonan regional na Aruba

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options