Aruparking reactiva!

Durante un conferencia di prensa dia 2 di mei, Minister di Transporte, Sr. Ursell Arends a duna di conoce cu den diferente combersacion cu comerciante local, Aruparking a ricibi comentario positivo y a mustra di ta un adicion practico pa centro di ciudad. E intencion ta pa Aruparking para riba su mes pianan financieramente y haci e compania independiente di Arubus.

Den proceso di reactivacion di Aruparking, a haci diferente cambio pa mehora e servicio y regula parkeo den Oranjestad:

• 440 parkeo gratis adicional: 236 parkeerplaats na stacion di Arubus, 180 riba e strip di L.G. Smith Boulevard y 24 den centro di ciudad designa pa grupo special di adulto mayor, hende muhe na estado y hende cu limitacion fisico.
• Expansion di metodo di pago entre otro, Pay.aw, ArubaBank, Banco di Caribe, Credit Card y placa efectivo.
• Introduccion di permiso extraordinario (Bijzondere Parkeer Vergunning) pa por ehempel, truck cu a bin haci entrega den centro di ciudad y ta conta pa companianan cu ta opera pafo di centro di Oranjestad.

Pa por tin orden, doñonan di auto ta responsabel pa unda nan ta staciona y tambe si nan comete un infraccion. Un cos cu ta sigur ta cu wielklem ta pasa pa pasado. Esaki tabata un di e puntonan di preocupacion mas grandi den comunidad cual tambe a percura pa inmobilidad den centro di ciudad. Lo controla ehecucion y control di e maneho pa medio di multa pa incumplimento di pago pa servicio di parkeo ricibi.

Ora di infraccion, e doño (of manehador) di auto lo ricibi un prome advertencia y pa e di dos infraccion e lo ricibi un multa.Si no cumpli cu e pago, lo ricibi e factura di multa na adres di e doño di auto ( of manera e ley ta stipula exacto ‘houder van de voertuig’), identifica pa medio di impuesto di auto.

Tene na cuenta cu si staciona incorecto riba acera of na un manera cu ta obstaculisa trafico y orden publico, Aruparking lo tuma e medida pa touw e vehiculo di inmediato unda e gasto lo cay riba e doño (of manehador) di auto.

Lo implementa reanudacion di Aruparking den su totalidad den fase unda lo sigui monitor y evalua cada paso.

Minister di Transporte ta enfatisa cu e puntonan cardinal lo keda orden, control y mobilidad.

Pa mas informacion riba e servicio di Aruparking por yama 5202323 of via email info@aruparking.com.