Aruba tin ley pa cuida salud di comunidad y di nos animalnan

Dit item is gearchiveerd op 08-08-2020.

ORANJESTAD  Relaciona cu un caso di un cacho importa ilegalmente for di Colombia, Departamento di Salud Publico ta informa tocante prohibicion di importa cacho for di e.o. Sur America.

Edificio Servicio VeterinarioVeterinaire Dienst cu ta un servicio di Departamento di Salud Publico ta e seccion cu ta supervisa e leynan relaciona cu salud di animalnan. Veterinaire dienst ta traha cu diferente ley pa proteha nos comunidad di “zoonosis”, cu ta malesanan transmiti di bestia pa hende manera rabies y COVID-19, pa proteha nos fauna indemico y nos animalnan di malesanan infeccioso di bestia manera parvo y schroefworm. Veterinaire Dienst ta traha hunto cu Douane pa supervisa e ley di importacion di animal y pa salvaguardia salud di comunidad henter.

Na momento cu un persona tin pensa di biaha cu su mascota, ta deber di e persona pa di antemano revisa e condicionnan rekeri na e instancia oficial di e pais na unda nan kier bay di biahe, pasobra cada pais tin nan leynan y condicionnan.
Na Aruba ley ta stipula pa añanan caba cu ta prohibi di bin cu cacho for di Sur- y Centro America, incluyendo Mexico, St. Domingo, Haiti y Cuba.

Recientemente a sali den publicidad un caso unda a importa ilegalmente un cacho for di Colombia. Mester enfatisa cu e ley ta bisa cu no por importa cacho for di e paisnan menciona.

CachoPa loke ta e caso particular aki ta asina cu 2 siman pasa a trata di drenta Aruba ilegalmente cu e cacho. Douane cumpliendo cu ley no a permiti e cacho drenta Aruba y a splica corectamente na e doño e motibo di esaki. Den casonan asina unda ta purba importa animalnan den forma ilegal, normalmente ta purba di manda e animalnan bek nan pais riba e mesun vuelo, pero esaki no a logra y douane a tuma contacto cu Veterinaire Dienst pa tuma e animal over. Desde e dia aki e cacho ta den cuarentena manera stipula pa ley pa asina duna e doño chens pa regla pa e bestia bay bek. Lamentablemente e doño no a uza e tempo aki pa busca solucion pa manda e cacho bek.

Den nos leynan e unico excepcion pa un famia por bin cu su mascota Aruba ta mudamento. Pa esaki tin condicionnan hopi estricto mara na dje y e cacho mester ta un miembro di famia, kiermen e mester por a biba cu e famia pa mas cu 6 luna. Contrario na declaracion di e doño di e cacho, Douane y Veterinaire Dienst a constata cu e doño y e cacho no ta cumpli cu e exigencianan pa por drenta Aruba. E cacho no tin tur e vacunanan y testnan necesario y tampoco  por considera e cacho un inboedel. Pa considera un animal un inboedel prosedente di Sur America tin un proceso estricto y largo cu e cacho tin pa cumpli cu ne pa descarta tur malesa infeccioso.  Ademas e cacho ta procedente di un pais unda importacion ta estrictamente prohibi. E persona tawata na altura di e prohibicion manera e mes a declara.

Casonan manera esaki ta sosode cu frecuencia y Veterinaire Dienst ta cumpli cu ley manera cu esaki ta indica. Veterinaire Dienst ta enfatisa cu e leynan tey y  mester cumpli cu nan.  

Veterinaire Dienst ta haci su trabou pa vigila cu ningun animal ta drenta Aruba ilegalmente cu e risico di por causa un brote of epidemia di malesanan infeccioso na Aruba.
E cacho encuestion mester wordo manda bek pa Colombia pa asina evita cu lo mester pone drumi. E decision a wordo tuma cu e cacho lo tin cu bay bek. Ta e deber di e doño pa percura pa esaki y e ta haya e espacio aki tambe. Nos ta lamenta cu e persona no a informa su mes promer cu e la importa e cacho. Ley ta pa tur hende cumpli y no por haci excepcion riba dje.
 

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options