Aruba ta ricibi e first call di Harmony of the Seas den nos waf

ORANJESTAD – Riba 16 di november 2022 Aruba ta ricibi un otro First Call di un mega crucero den e caso aki di Harmony of the Seas di Royal Caribbean Cruiselines.

Tabata un dia cu hopi movecion turistico den nos centro di ciudad cu nos waf yen di barconan crucero. Conhuntamente cu e barconan crucero di Celebrity Reflection y Enchanted Princess tabata tin mas di 10 mil turista crucero diaranson riba Aruba. Esaki sigur ta refleha cu nos recuperacion ta den ful swing.

Barco crucero Harmony of the Seas Locual ta hopi positivo pa Aruba ta cu den henter e ruta di e barco crucero, e porta di Oranjestad ta esun caminda mas ora (15 ora) e a keda staciona. Esaki ta nifica cu e pasaheronan aki lo tin mas ora pa nan aporta na Aruba su economia.

E barco aki por acapara 6687 pasahero, tin un total di 16 piso y ta midi 363 meter di largo. Tambe Harmony of the Seas ta nabega uzando 30 porciento di gas LNG cu ta haci’e mas amical pa nos medio ambiente.

Minister di Turismo, Dangui Oduber a indica cu ta keda demostra cu e preparacionnan haci riba nos waf ta dunando su frutonan. A haci inversionnan grandi di 14 miyon florin pa Aruba por haya e tugboat Colorado pa por yuda e mega cruceronan aki nabega drentando nos waf. Aruba Port Authority a inverti 1.6 miyon florin pa realisa e trabaonan di coba y haci limpi (draga) 100 meter bao di laman na waf, pa asina logra haya e profundidad di entre 12 pa 13 meter bek. Tur esaki nan ta preparacionnan cu a haci pa por a ricibi e prome mega crucero aki, asina a trece dilanti.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options