Riba 14 di juli 2022, hunto lo presenta e VNR raport di tur pais den Reino Hulandes oficialmente na Nacionnan Uni. Esaki ta delinea e progreso cu cada di nos a haci den implementacion di e SDGs y lo menciona e retonan cu tabata confronta den e proceso di implementacion.
Conseho di Minister di Reino a acorda e rapport conteniendo e implementacion di SDG di cada pais den Reino Hulandes. E raport aki ta contene un capitulo di cada pais den Reino y alabes un capitulo riba e situacion special di islanan y e desafionan unico cu nos ta afronta. Entretanto a manda e VNR report pa Nacionnan Uni di Den Haag y ta disponibel via e link:
https://hlpf.un.org/countries/netherlands/voluntary-national-review-2022
E presentacion di dia 14 di juli ta sigui un proceso di revision door di miembronan, y na unda lo ta provee recomendacionnan riba con pa mehora e proceso di implementacion di e metanan pa Desaroyo Sostenibel di Nacionnan Uni pa cada pais den Reino.
E comision di SDG Aruba, cu a keda institui pa provee un direccion strategico y pa coordina e implementacion di e SDGs, a organisa diferente sesion pa envolve e comunidad pa identifica bon practicanan di organisacionnan local den implementacion di e metanan di Nacionnan Uni y cu a forma parti di e raport cu a entrega. Pasobra ta tuma henter comunidad pa implementa e SDGs den un pais.
Historia:
Den september 2015, tur miembro di Nacionnan Uni (UN) unanimamente a adopta e programa internacional mas integral y ambicioso pa por crea un mundo mas sostenibel pa tur, creando 17 meta specifico, Metanan Mundial pa Desaroyo Sostenibel (SDGs), pa logra un miho mundo cu nos tin awo pa 2030. Aruba tambe ta parti di e esfuerso pa por logra e obhetivo aki.
E lista di “TO DO’s” aki ta crea un agenda na unda cu e desaroyo no ta basa solamente riba e perspectiva economico pero tambe ta inclui aspectonan social y di medio ambiente. Pa por implementa un structura efectivo di e Metanan Mundial pa Desaroyo Sostenibel (SDGs) y e agenda extenso pa 2030 y crea un Aruba miho y sostenibel, ta rekeri un comunidad comprometi y activo. Mas uni nos ta, mas y miho nos ta logra. Realisando cu no tur e metanan por wordo realisa pareu.
Share this page