Aruba ta haya 12 miyon florin pa atende cu e crisis di Venezuela

Un parti di e 55 miyon florin Hulanda lo uza pa e mes yuda nos y e otro parti, Aruba y Corsou mester a entrega nan lista structural di plannan y proyectonan y entrega esaki na Hulanda. Aruba aworaki ta yegando na e punto culminante na unda cu Hulanda lo duna e fondonan pa realisa e plannan y proyectonan di Gobierno di Aruba den e situacion aki.

Prome Minister Evelyn Wever-Croes a indica cu Aruba lo ricibi alrededor di 12 miyon florin pa yuda den e crisis di Venezuela. E 12 miyon florin aki ta bay pa:

• fortifica Aruba como pais den haci Aruba mas sigur pa asina atende cu e crisis miho posibel;
• yuda Aruba pa controla nos fronteranan miho p’asina nos percura pa domina e crisis cu nos tin internamente.
• Haci e control riba lama y tera bira mas estricto p’asina evita importacion ilegal di sustancianan, arma como tambe di persona. E tema di mensenhandel y mensensmokkel ta un problema serio cu ta tumando luga demasiado hopi den nos region.

Tambe e placa aki lo amplia e capacidad di detencion na unda esnan ilegal por keda mientras nan ta warda e fecha prome cu manda nan bek pa nan pais. Esaki den e tempo aki ta hopi importante y necesario mirando e fluho di iligalidad na Aruba a aumenta. Ampliacion di e capacidad di detencion lo trece mas trankilidad. Lo uza parti di e fondo aki tambe pa enseñansa. E crisis den enseñasa como e crisis di Venezuela riba tereno social tambe por haya mas atencion.

Ta bon pa remarca si, cu e placa aki lo no ta disponibel pa crea vivienda y otro cosnan asina pa e personanan cu ta bin haci peticion di asilo. E placa aki ta bay pa fortifica Aruba como pais den haci Aruba mas sigur pa asina atende cu e crisis miho posibel.