E reconocemento aki a tuma luga durante e di 15 edicion di e “European Identity and Cloud Conference'', cu a tuma luga na Berlin den e siman di 12 di mei 2022.
A crea Aruba Health App durante e pandemia di COVID-19 pa facilita e proceso di test y tambe pa centralisa informacion di cada pashent di un manera optimal, digital y accesibel pa tur hende den comunidad di Aruba. A reconoce Sociedad International di Telecomunicacion Aeronautico (SITA) pa e implementacion di un sistema asina innovativo y unico, pa locual ta trata e credencial di pasaheronan biahando pa Aruba.Tur e paisnan cu ta destaca den e industria aki tabata presente na e conferencia aki. Durante e ceremonia aki diferente pais, manera Chile y United Kingdom a gana premio, di cual Aruba tambe tabata un di nan cu a haya elogio.
Segun e compania di analisis Global KuppingerCole, e uzo di e sistema di Aruba “ta un solucion caminda cu pasaheronan por presenta nan dato personal di salud na aerolinea, hotel y tur e partnernan den e industria di hospitalidad den un forma priva y sigur”. Ta importante pa pone enfasis riba e hecho cu Aruba, un pais asina chikito, tabata un ehempel pa diferente pais mas grandi, cual a opta pa implementa e sistema aki tambe despues cu nan a wak con eficiente e aplicacion aki ta.
Minister di Turismo y Salud Publico Sr. Dangui Oduber ta gradici tur stakeholders cu a participa den creacion di e Aruba Health App, cual a promove Aruba internacionalmente. Palabra di danki na e participantenan cu ta DVG, LabHOH, AAA, ATA, Imigracion Aruba, DCA, AZV, SETAR, Gama & SITA. Un danki tambe na Hilton Hotel Aruba, Butterly Farm Aruba y Lola Taqueria cu a yuda grandemente cu e proyecto piloto aki.
Share this page