Aruba ta cla pa keda baha fo'i lista preto di Union Europeo (UE)

E cambionan necesario a keda pasa na april den Parlamento di Aruba y cu esaki awor Aruba ta cla pa keda baha fo'i e lista preto di Union Europeo.

Union Europeo siguiendo e pasonan di e Organisacion pa Cooperacion y Desaroyo Economico (Organization for Economic Cooperation and Development - OECD)  OECD a haci un investigacion na aña 2015 riba regimen fiscal cu por ta causa daño y competencia inhusto entre paisnan miembro di e organisacion. Den e investigacion aki a sali na cla cu ta considera 3 regimen fiscal na Aruba como competencia inhusto y no ta cuadra cu e reglanan di OECD. Ta trata aki di e San Nicolas Regime, e patent box di e IPC regime nobo y e Transparencia di Vehiculo Corporativo (transparency of corporate vehicles). UE a acerca Gobierno di Aruba pa  por haci e cambionan necesario, ya cu si no cumpli cu e reglanan Aruba lo bay riba e lista preto di paisnan cu ta permiti pa negoshi paga hopi menos of keda sin paga impuesto. 

Gobierno a logra elimina e patentbox di e IPC regime nobo entrante 18 di oktober 2017 y a aboli e San Nicolas Regime na october 2018 conforme acuerdo cu UE, pero no a logra keda cla na ora cu e cambionan na e Transparencia di Vehiculo Corporativo promer cu e deadline di 1 di januari 2019. Pa e motibo aki, na maart EU a dicidi di pone Aruba riba nan lista preto di paisnan cu no ta coopera cu un sistema fiscal husto. 

Dia 4 di april 2019 e cambionan necesario den e leynan 'Algemene Landsverordening Belastingen' y e 'Landsverordening winstbelasting' a keda aproba pa Parlamento y dia 10 di april e 'Landsbesluit aanwijzing reële economische aanwezigheid transparante vennootschap' tambe a keda decreta. Cu e cambio di e leynan aki y e decreto, Aruba a cumpli cu e cambionan necesario y a manda esaki mesora pa EU pa por cuminsa e 'delisting process' pa por baha Aruba fo'i e lista preto. 

For di UE a recibi notificacion cu e Ley y e Decreto ta 'EU compliant' y pesey dia 17 di mei proximo durante e reunion di e Ministernan di Finansas di UE, Aruba por baha fo'i e lista preto y por figura atrobe entre e paisnan cu tin un sistema fiscal cu no ta fomenta un concurencia cu ta inhusto.