Aruba ta anfitrion di conferencia tocante preparacion y resiliencia financiero den caso di calamidad pa paisnan den Caribe

Presente na apertura di e conferencia riba 1 di november 2022 ta Prome Minister Evelyn Wever – Croes, miembronan di Parlamento, Minister di Asuntonan Economico, Comunicacion y Desaroyo Sostenibel Geoffrey Wever, di World Bank sr. Federico Baechi, sra. Mary Boyer y sr. David Sislen, di  Caribbean Catastrophe Risk Insurance Facility (CCRIF SPC) sr. Isaac Anthony y sra. Elizabeth Emanuel, di delegacion di Union Europeo na Guyana sra. Layla El Khadraoui, representantenan di RESEMBID regional program, y tambe representantenan di Caribbean OCT.

Prome Minister Wever - Croes den su discurso na apertura di e conferencia a indica cu e ta sumamente esencial pa como Isla Chikito den Desaroyo (SIDS) pa ta uni, y pa comparti experiencianan den Caribe ora cu ta confronta cu crisis regional y desaster natural. Tambe ta importante pa ta financieramente resiliente pa por recupera mas pronto cu ta posibel despues di un desaster. Aruba te cu awo ta bendiciona pa no a sufri di desasternan grandi. Sinembargo, tin cu ta consciente di e riesgo cu desaster natural por tin riba e isla, negoshi, comunidad y medio ambiente. Caribe ta e area cu tin mas riesgo pa catastrofe natural manera horcan. Ademas, Aruba tin responsabilidad social cu otro islanan den Caribe cu regularmente ta afecta pa disasternan natural.

Seguro den caso di calamidad

Un di e instancianan na e workshop ta specialisa den e area di seguro, y nan lo amplia riba e posibilidadnan cu paisnan tin pa cera un seguro. Den e caso di cualkier calamidad, e compania ta percura pa provee e fondonan aki dentro di dos siman pa e pais afecta. Recientemente Nicaragua y otro dos pais den region, a haya e fondonan aki den dos siman y asina nan por a cuminsa traha riba recuperacion. Mayoria di isla cu ta depende di fondo turistico no tin e forsa financiero grandi, pa ora cu un calamidad dal. Pues e tipo di workshop nan aki ta yuda paisnan pa prepara nan mes pa esaki.

Trabou realisa door di BRA

Aruba su delegacion ta presente na e workshop pa siña mas y ta mihor prepara. Bureau Rampenbestrijding Aruba (BRA) tin e responsabilidad pa prepara nos den caso di cualkier disaster. E ta encera mantene hende sigur, conecta e informacion y na aspectonan cardinal di maneho di negoshinan, pa nan por keda den operacion den un situacion dicrisis/desaster. 

Organisacionnan cu ta planifica, prepara y entrena den caso di interupcion inespera, a mustra di ta esunnan cu ta recupera nan operacion normal mas liher. Den cuadro di esaki BRA a desaroya un “Aruba Incident Management System”, di acuerdo cu recomendacionnan y practicanan internacional.  E sistema aki ta provee structuranan standarisa pa organisacionnan, pa loke ta funcionamento, procesonan y terminologia pa uza na diferente nivel di emergencia “emergency response” na Aruba. E “Aruba Incident Management System” ta atende cu e necesidad pa coordinacion ora cu tin di haber cu ‘response’ di tur tipo di incidente, di parti organisacionnan di Aruba y partnernan rond mundo. E sistema ta integra practicanan efectivo y ta encera preparacion den caso di emergencia y con pa responde, den cuadro nacional pa maneho di cualkier incidente. Ademas, e Aruba Incident Management System, lo haci posibel cu esnan encarga cu ‘response’ na tur nivel \traha hunto mas efectivamente, pa maneha incidentenan domestico, no obstante e causa, tamaño of con complica e situacion ta.

BRA ta percura cu na Aruba profesionalnan ta prepara adelanta.Aworaki falta e aspecto financiero pa no mester ta depende di otronan y asina por reacciona mesora den caso di calamidad.