Pa prome biaha Aruba su nomber a zona den e programa AGT. Pueblo henter por a wak Aruba representa den un programa cu mundialmente tin un sintonia hopi grandi.
Ken ta RCC Aruba
RCC Aruba ta consisti di bailarinnan Arubiano y acrobatanan Colombiano, Cubano y Venezolano. Acrobata di varios Pais internacional cu a haci Aruba nan cas cu desde 2010 ta duna presentacion den varios hotel aki na Aruba.
Ya pa un tempo basta largo RCC Aruba a bin ta promove Aruba riba tarima internacional. Na aña 2019 RCC Aruba a cuminsa participa na festivalnan di circo internacional. Asina nan a participa na ‘China International Circus Festival’ na aña 2019 y a duna presentacionnan na tres diferente ciudad. Na december 2020 nan a duna mas cu 60 presentacion na Budapest na Hungria.
Na januari 2021 RCC Aruba a participa na otro Festival di Circo mundialmente renombra ‘Circo ‘Budapest Circus Festival’ na Hungria. RCC Aruba a gana e tercer premio y un premio special.
RCC Aruba ta representa Aruba dignamente cu hopi orguyo y amor.
Minister di Cultura, Xiomara Madura ta subraya cu bunita di e artistanan aki ta cu na tur Pais caminda nan ta presenta, e grupo ta representa Pais Aruba y ta carga bandera di Aruba cu hopi orguyo y honor.
Desde di e presentacion di RCC Aruba na Budapest, nan a ricibi contratonan na circonan renombra mundialmente.
Actualmente RCC Aruba ta na Inglatera participando den e Summer Circus & Water Spectacular den Hippodrome Circus na Londres, Inglatera. Esaki ta un circo unico ya cu su escenario ta rondona na awa. Despues di nan presentacion na Inglatera, nan ta continua na september cu presentacionnan na Italia y den luna di october na Francia.
Minister di Cultura Xiomara Maduro na nomber di Gobierno y pueblo di Aruba ta gradici tur miembro di e grupo di RCC Aruba pa representa Aruba riba tur tarima internacional. Pais Aruba ta hopi orguyoso di boso y masha pabien cu boso clasificacion pa e dos ronda pa e audicion den e programa di AGT.
Share this page