Aruba lo tin ley nobo pa maneho di haf y awanan teritorial (gearchiveerd)

E ley cu ta uzando actualmente ta for di 1933 y Gobierno a mira e necesidad pa actualisa e ley segun e exigencianan di awendia pa entre otro uzo di awanan teritorial.
Pa loke ta e ultimo aki mester menciona cu autoridadnan local hopi biaha no sa kico ta pasa den e awanan rond Aruba.
Cu e ley nobo tur barco den e zona di diesdos miya, mester avisa Aruba pa medio di Direccion di Navegacion (directie Scheepvaart) 72 ora prome cu drenta, tocante nan actividadnan. Mester duna informacion tocante fecha cu nan ta yega, tipo di actividad y pa cuanto dia nan lo keda.
Mescos cu otro paisnan, Gobierno di Aruba tin e intencion pa cobra “awaiting orders”, esta pa cobra e barconan cu ta nabega den e awanan teritorial di Aruba pa haci trabou. E medida aki lo no conta pa e botonan crioyo y pa yatenan mara na Seaport Marina, Varadero of Nautical Club.
Pa sigura cu tur esnan envolvi ta cumpli cu e leynan, lo mester tin control severo den e awanan teritorial y pa esey minister Otmar Oduber lo firma un protocol cu Guarda Costa di Reino pa defini e trabounan cu e instancia aki mester haci pa supervision y control den e awanan teritorial di Aruba.