Aruba destinacion nr. 1 di Carnival Cruise Lines

Dit item is gearchiveerd op 21-02-2020.

ORANJESTAD (AAN): Riba 17 di januari 2020, un delegacion di Aruba a sostene diferente reunion dirigi riba turismo crucero.

Entre otro a reuni cu Carnival Cruise Lines na Miami, unda a toca diferente topico di importancia pa e industria di crucero di Aruba.

E delegacion a consisti di:

  • Minister di Turismo, Salubridad y Deporte, Sr. Dangui Oduber;
    CEO y Director di Aruba Tourism Authority (A.T.A.), Sra. Ronella Tjin Asjoe-Croes ;
  • Director di Aruba Ports Authority (APA), Sr. Marc Figaroa;
  • Consehero di Minister di Turismo, Srta. Sharlyze Romano;
  • CFO di APA, Sr. Humphrey Tromp Cruise Manager di A.T.A., Sr. Mario Arends.

Delegacion di Aruba y e representantenan di Carnival Cruise Lines na Miami.Durante e reunion aki, Carnival Cruise Lines a duna Aruba e grato noticia cu Aruba a conquista e promer puesto como e mihor destinacion y puerto riba nivel mundial. Esaki a surgi a base di e puntuacionnan cu e pasaheronan di e linea di crucero ta duna na diferente aspecto di nan vacacion y itinerario di e biahe crucero manera calidad di servicio, amabilidad, compras, restaurantnan, infrastructura, etc.

Aruba ta consistentemente un destinacion fuerte, cu semper ta score bon, y cu a tuma e puesto di promer lugar na 2019. Aruba su averahe den e ultimo aña ta riba 9 punto (10 ta e maximo), cual  ta un punto sumamente positivo y cu a duna Aruba e empuhe necesario pa logra obtene e posicion di mas halto den e region di Caribe y di mundo. E ehecutivonan di e linea di crucero a expresa hopi elogio pa Aruba. Aruba ta un destinacion y puerto ehemplar pa Carnival Cruise Lines. E linea di crucero a acentua e importancia di con Aruba ta desplega trabou di equipo cu un colaboracion estrecho entre Aruba Tourism Authority y Aruba Ports Authority implementando e maneho estableci pa Minister di Turismo y Gobierno di Aruba.

Carnival Cruise Lines ta e linea di crucero di mas grandi na mundo y a trece casi 200 mil turista crucero na 2019.

Minister Dangui Oduber a expresa su satisfaccion grandi y a enfatisa e importancia di e partnership entre Aruba y Carnival Cruise Lines y a compromete pa sigui traha den e mesun forma pa mantene y amplia e bentaha competitivo cu actualmente Aruba ta gosa di dje.

Minister Dangui Oduber ta felicita A.T.A., APA y tur esnan cu ta traha den e industria aki ya cu e logronan manera esaki ta bin a base di trabou hopi duro pa asina por brinda e mihor experiencia posibel na nos bishitantenan. Esaki ta sirbi como estimulo pa sigui bay dilanti y mester sirbi como un momento pa wanta nos skerpi, a yega number 1 mester sigui haci esfuerso pa mantene esaki.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options