Aruba a ricibi e prome avion cu vacuna

ORANJESTAD – Riba 16 februari 2021, Aruba a haya e prome lote di vacuna Pfizer.

Prome Minister mr. Evelyn Wever-Croes y Minister Turismo, Salud Publico y Deporte.  Dangui Oduber tabata presente ora e  vacunanan di Pfizer a yega.

Minister Dangui Oduber a declar acu e ta hopi contento cu e vacunanan di Pfizer ta na Aruba. Y cu nos ta cuminsa mira un luz na horizonte

Diamars ta un dia hopi importante pa pais Aruba cu e yegada di e vacunanan di pfizer. Minister Dangui Oduber na promer lugar nos kier gradici Dios cu nos ta biba na Aruba y cu nos ta forma parti di reino Hulandes cu nos tin acceso na e vacuna.

Nos kier gradici Secretario di Estado, Sr. Paul Blokhuis y Gabinete Rutte pa por a yuda Aruba haya e vacunanan riba 16 februari 2021 manera a ser priminti. 

Yegada di e vacunanan di Pfizer na Aruba.Aruba a ricibi 11.700 vacuna di Pfizer cual sigur nos ta hopi contento cu e cantidad aki considerando e scarsedad di vacunanan cu tin na mundo actualmente.  Mi ta kere ta importante pa pone esaki den perspectiva. Ayera Colombia un pais di miyones di habitante a haya 50.000 vacuna di Pfizer mientras Aruba cu apenas 100.000 habitante a haya 11.700 vacuna cual ta hopi bon. 

Nos na Aruba mester ta contento y hopi agradecido na esaki y sigur na gobierno Hulandes pa e yudansa aki. 

For di luna di december 2020 pais Aruba ta preparando pa nos por ta cla pa ricibi e vacunanan. Henter un team multidisciplinario cu ta consisti di Ministerio di Turismo, Salud Publico y Deporte, departamento di salud publico, BRA, DOW, IVA, VDA, KPA, Douane y Setar a bin ta prepara na e mihor forma posibel pa ora e vacunanan yega nos ta cla pa cuminsa vacuna nos hendenan. 

Mi tin cu bisa cu un team hopi dinamico a traha riba nos plan di ehecucion y tambe haci tur e preparacionnan pa e bishita di RIVM. RIVM a bishita aruba pa haci e controlnan y supervision necesario riba nos planan y tambe evalua esaki. Minister Oduber kier a gradici cada colega di Gabinete Wever Croes pa nan esfuersonan haci. 

RIVM a yega Aruba riba 25 di  januari y nan a haya un presentacion amplio di nos strategia di vacunacion y tambe nos plan di ehecucion con esaki ta hinca den otro. 

A controla e freezernan hunto cu tur e instalacionnan y henter e cold chain. 

Tambe a bishita tur e localidadnan caminda lo duna e vacunanan y a check e transporte y seguridad. 

Aruba lo tin localidad cu lo uza pa duna e vacuna:

  • Club Don Bosco na Noord
  • JFK Education Center na Oranjestad
  • Centro Libertador Betico Croes na Santa Cruz
  • Santa Therisita Center na San Nicolas

E vacuna ta di vital importancia pa cada un di nos cu ta biba riba e pais aki. E vacuna lo: 

  1. Proteha nos mesun salud;
  2. lo scapa bida di hende;
  3. lo crea immunidad;
  4. lo percura pa recupera nos turismo y cuminsa bolbe bek poco na normalidad. 

Yegada di e vacunanan di Pfizer na Aruba.Desde luna di december cu e vacuna a subi mercado te cu awe mas cu 170 miyon vacuna a wordo duna rond mundo.  Nos como gobierno a cuminsa un campaña pa conscientisa nos comunidad riba e importancia di e vacuna.

Conforme nos srtategia y planificacion e prome batch lo destina pa: 

  • Pa dunadornan di cuido;
  • Esnan cu ta biba na casnan di cuido;
  • Esnan riba 60 anja di edad; 
  • Lo wordo duna e promer vacunanan riba 17 februari 2021 na Club Don Bosco y a invita prensa na Aruba pa ta presente na e momento importante aki. 

Nos kier enfatisa cu e pre registracion ta sigui y ta pidi comunidad pa haci esaki mas pronto cu ta posibel. E interes ta halto y ja caba tin mas di 10.000 persona a pre registra caba. Por haci esaki via e Aruba Health App of na e 4 MFA nan na Aruba.

Aruba, ban vacuna, ban cuida nos mes, ban proteha nos mes, ban salba bida y percura pa nos por recupera nos turismo y economia Minister Oduber a termina bisando.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options