Aruba a logra yega 0 caso activo di Covid-19

Dit item is gearchiveerd op 29-06-2020.

ORANJESTAD - Departamento di Salud Publico DVG y Gobierno di Aruba riba 28 di mei 2020 a ricibi e informacion cu e ultimo persona cu tawata interna den ICU cu e virus di COVID-19 a test negativo.

Casonan di coronavirus na Aruba 28 di mei 2020Esaki nifica cu e persona no tin e virus activo mas den su sistema y awor ta recuperando den Dr. Horacio Oduber Hospital.

Esaki ta haci cu e cifra di persona recupera a aumenta na 98 y caso activo di COVID-19 ta na e momento aki 0.

Departamento di Salud Publico y Gobierno di Aruba ta desea di felicita e Crisis Team completo pa nan aporte y consehonan brinda cu a yuda Gobierno den tuma e miho desicionnan. Tambe un palabra di danki ta bay na tur esnan cu a traha den prome linea (frontliners) y na comunidad completo cu a pone nan confiansa den e capacidad di nos profesionalnan y a sigui tur conseho y instruccion duna.

Pa nos sigui logra nos mester sigui aplica tur e medidanan di prevencion manera DVG ta recomenda. Distanciamento fisico-social, laba man y si bo tin sintoma keda cas y consulta cu bo dokter di cas.

Un biaha mas pabien pueblo di Aruba pa e gran diciplina y solidaridad demostra durante tur e simannan cu a transcuri, Uni nos ta Vence!

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options