ARUBA A FIRMA ACUERDO CU URBAN HYDRO TECH SURINAM

Dit item is gearchiveerd op 30-12-2021.

ORANJESTAD –  Aruba su agricultura ta encontra diferente limitacion, manera entre otro, e prijs di awa y coriente na un prijs competitivo, e limitacion di tereno y e temperatura extremo pa motibo di e cambionan climatico. Esaki ta haci’e difícil pa produci riba un escala mediano of grandi y den un forma innovativo y sostenibel.

Durante e pandemia di Covid, tabata tin hopi preocupacion, pa locual ta disponibilidad di fruta y berdura, pa motibo di e dependencia di nos isla riba alimentonan importa. Alabes nos ta haya nos mes confronta cu e incremento den e prijs di fleta, cual tin un impacto directo riba e prijs di cuminda.

Sinembargo, durante e ultimo 4 añanan, nos por aprecia cu tin hopi mas interes pa produccion den sistema hydroponico, cual ta un sistema modernisa di produci cuminda, cu por brinda mas garantia riba e exito di e cosecha. Esaki sigur ta un posibel solucion pa e problemanan menciona anteriormente y cual ta capta e atencion di e hobennan, pa motibo cu nan ta sistemanan innovativo y modernisa. Na 2016, Santa Rosa conhuntamente cu TNO, a conduci un estudio riba un variedad di producto incluyendo productonan local, manera boonchi, comcomber y yambo cu a bay bon. E resultado a mustra cu e sistema aki por ofrece e posibilidad di e diversificacion den e tipo di producto.  

E otro factor cual ta haci’e dificil pa un entrepeneur chikito por inicia cu un proyecto agrario modernisa ta, e costo di e ekipo y diferente fertilisante cu mester pa e produccion. E factor aki ta locual den nos concepto, ta haci’e dificil pa logra stimula mas productor pa inverti den e tipo di sistemanan aki. Por construi e sistema aki cu materialnan cu por cumpra na Aruba mes y cual ta mas facil tambe pa instala.

Como Departamento encarga cu e Sector Primario di Aruba, Santa Rosa ta reconoce e importancia y e oportunidad, cu den futuro, un sistema hydroponico por ofrece nos di e sector agricola. Den cuadro di esaki, a studia e desaroyo cu tin na Surinam y pa cual motibo nos a acerca e compania Hydroponics Technologies Suriname, kendenan a crea un modelo mediante un sistema mas simplifica y compacto, caminda un cooperativa ta maneha e afzet.

E modelo di cooperativa aki ta ofrece diferente workshops na esnan interesa, duna sosten na momento di problema, disponibilidad di producto den e mercado y ta encarga cu  henter e parti di promocion y benta cu na su turno ta genera fondo pa haci e cooperativa selfsustainable.

Regularmente, clientenan of e productornan artesanal, ta expresa cu nan tin interesa pa ricibi mas conocemento di con pa produci den un sistema hydroponico, pero ta prefera pa inicia cu un sistema chikito. Den pasado, ya e compania, Hydroponic Technologies Surinam a acerca Departamento di Agricultura, Cria y Pesca, cu e oferta pa haci un proyecto hunto cu DLVV, pa conscientisa, educa y presenta posibilidadnan con e sistema aki por genera productonan fresco y alabes aporta na nos economia, den forma di micro business. Lamentablemente pa motibo di e pandemia, no por a continua cu e proyecto aki.

E gerencia di e Departamento di Agricultura, Cria y Pesca conoci como Santa Rosa, ta sumamente contento cu e sosten y cooperacion ricibi for di Minister Ursell Arends, kende a ricibi un presentacion for di e Director di Urban Hydro Tech Surinam, Sr. Delano Pontit y inmediatamente a expresa cu e ta duna su greenlight pa continua cu e proyecto. Recientemente a formalisa e contrato oficialmente entre Minister Arends, encarga cu Integridad, Naturalesa, Transporte y Adulto Mayor y Hydro Tech Surinam, den presencia di Sra. Nathalie Maduro, Director di Santa Rosa y Sra. Karin Paris, Chief of Staff pa e Ministerio di Integridad, Naturalesa, Transporte y Adulto Mayor.

E proyecto mes lo inicia na januari 2022, pero ya e proceso di planificacion y formalisacion di e contrato a keda finalisa. 

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options