Aruba a celebra un bunita Parada Nacional di Luz yen di gozo, union y den forma ehemplar

Minister di Cultura, Xiomara Maduro hunto cu Minister di Turismo Dangui Oduber a haci apertura di e parada.
Despues di un bunita show di acrobacia presenta pa RCC Aruba, e dos Ministernan a cende e mecha pa duna inicio na e parada.

E parada a cuminsa cu un bunita desfile di nos Reinanan, Prins cu Pancho y nos Damanan Cultural  escolta pa Roland Helder di Departamento di Cultura Aruba. E parada a conta cu participacion di 6 grupo cu animacion musical di seis banda y dos brassband.

Por a admira varios carnavalista cu nan bunita bodypieces y headpieces, y tabata bunita pa mira sra. Riri Botta y su grupo cu nan roadpiece celebrando 45 aniversario di El Gaucho den e parada. Mester bisa cu tur esnan cu a participa den e parada of a para banda di caminda por a presencia e gozo, union y creatividad di Aruba su hendenan den e Parada Nacional di Luz aki.

Minister Maduro ta gradici:

• Presidente di Comision Celebracion Dianan Nacional, sr. John John Flemming;
• sr. Lyonel Dirksz, vocero di e parada;
• tur boluntario y e team completo cu a asisti e mandatario  pa prepara, coordina y guia e Parada Nacional di Luz;
• Minister Dangui Oduber pa su apoyo;
• ATA;
• Setar;
• tur otro compania estatal y sponsernan;
• Cuerpo Policial;
• Servicio di Ambulance;
• Cruz Cora;
• Departamento di Obranan Publico;
• Serlimar;
• Prensa di Aruba y tambe di Corsou pa informa y brinda cobertura na e bunita evento cultural aki di Aruba;
• Cada participante pa nan bunita aporte na e Parada Nacional di Luz;
• na tur persona y instancia cu a contribui na e exito di e Parada Nacional Luz.