Artesanonan por entrega obranan nobo cu ainda no tin seyo nacional di artesania.

ORANJESTAD - Departamento di Cultura Aruba (DCA) conhuntamente cu e Comision di Seyo Nacional di Artesania Aruba ta invita artesanonan pa haci entrega di tur material nobo cu NO tin Seyo Nacional di Artesania ainda.

Artesania cu Seyo Nacional di Artesania  Dia 26 di februari 2021 lo tuma luga nos di prome evaluacion pa e aña aki, caminda e comision ta bini hunto pa pasa riba tur e criterianan necesario pa e producto bini na remarca pa e Seyo Nacional di Aruba.

Ta haci un yamada na e artesanonan pa entrega tur nan producto nobo pa mas tarda riba dia 24 di februari 2021 prome cu merdia na DCA.

Artesania cu Seyo Nacional di Artesania  Por aplica na Departamento di Cultura Aruba na su adres nobo cual ta na John F. Kennedy Educational Center cu ta keda na riba Stadionweg 37, Oranjestad Aruba, banda di Cas di Cultura.

Pa esaki mester *yena e formulario di aplicacion, *mester trece un identificacion valido, *un pasfoto, *como tambe un comprobante di adres.

Pa mas informacion tocante e Seyo Nacional di Artesania Aruba y tambe tocante e proceso di aplicacion por fabor tuma contacto cu nos via telefon 582-2185.

Artesania cu Seyo Nacional di Artesania  Criterianan pa bini na remarca di un Seyo Nacional di Aruba ta:

  • Mester ta traha na man. (No cu machine, pero cu herment manual senciyo)
  • Autentico, diseño original.
  • Consistencia den (re-) produccion di diseño y modelo.
  • Grado di experticio (tradicional) den trahamento di e producto.
  • E producto mester ta traha na Aruba.
  • Grado di uzo di material local.
  • Grado cu e producto ta refleha tecnicanan di artesania tradicional.

Artesania ta un arte caminda cu creativdad den forma di e arte y cultura ta haya bida. Ban sigui enrikece y contribui na nos productonan artesanal local.

Ta danki na nos artesanonan cu mas y mas nos tin obranan artistico local y di Aruba mes.

Cultura nos mester bib’e.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options