Appel di Oro 2018 Premio Nacional di Excelencia den Enseñansa

Despues cu durante cuater aña consecutivo (2011-2014) a organisa e proyecto Maestro di Aña – un premio di reconocemento pa e Maestro di Scol, na aña 2015 a scoge pa amplia e proyecto pa duna reconocemento na mas actor cu ta importante pa enseñansa.

Consciente di e balor di e trabou den enseñansa y e reconocemento cu e merece, e proyecto a nace cu e meta pa duna atencion na e cosnan positivo cu ta sosode na scol y den klas, duna reconocemento pa e trabou den enseñansa y ilustra y stimula enseñansa di calidad.

PARTICIPACION

Appel di Oro ta un premio cu ta rindi honor y reconocimento na tur esnan cu ta desplega excelencia den nan trabou diario den enseñansa.

Participacion na Appel di Oro ta habri pa tur scol di Enseñansa Primario, Enseñansa Secundario, Enseñansa Special y Enseñansa Superior reglamenta na Aruba.

Cu e Premio Nacional di Excelencia den Enseñansa lo duna reconocemento den e categorianan di:

Proyecto Escolar (Proyecto di Innovacion), Maestro, Dirigente (Cabesante, Director di Scol, Rector of Unit Manager) y Lifetime Achievement (Maestro, Dirigente, Director, Rector, Unit Manager, Actor di Sosten pensiona of cu ta bay baha cu pension).

CRITERIA

E comision di hurado, bou guia di Departamento di Enseñansa, ta evalua y fiha e criterianan tur aña. Aki ta tene cuenta cu e:

• aspectonan pedagogico-didactico manera variacion di forma didactico, organisacion di klas, enseñansa atractivo, cu sentido y riba nivel di e alumno.
• aspecto social manera relacion cu alumno, colega y mayor.
• aspecto personal manera desaroyo propio y profesionalismo.
• tereno di innovacion y kico su vision ta pa Enseñansa na Aruba.

Henter comunidad: alumno, studiante, mayor, coleganan maestro y/of dirigente di scol, ta bonbini pa nomina un persona of proyecto escolar pa Appel di Oro 2018.

E temporada di nominacion pa aña 2018 ta core 12 di november te cu diabierna dia 12 di december 2018.

Departamento di Enseñansa ta invita tur esnan cu tabatin un experiencia excepcional cu un proyecto of un miembro di e personal di nan scol of den pasado como studiante na un of otro scol, pa nomina e proyecto of persona aki pa e premio Appel di Oro.

E proyecto Appel di Oro ta un oportunidad pa reconoce esnan cu ta destaca den enseñansa, esnan cuta contribui na y representa excelencia den enseñansa, es decir, "Nos Heroenan di tur dia".

Pa cualkier pregunta relaciona cu e proyecto Appel di Oro por tuma contacto cu sra. Sharine Croes na telefon 528-3415 of via email appeldioro@ea.aw.