Apertura di ‘Export Week 2021 ‘Conquering new horizons’

ORANJESTAD – Riba 7 di juni 2021, Minister Xiomara Maduro a haci e apertura di ‘Export Week 2021: Conquering new horizons’ na un manera virtual.

E unidad Exprodesk di Departamento di Asuntonan Economico, Comercio y industria a  organisa ‘Export Week 2021’.

Economia di Aruba a conoce un transformacion

Apertura Export Week - Conquering New Horizons’Minister Maduro a yama bon bini na tur e participantenan local y e oradonan local e internacional y a splica cu a establece na e unidad Exprodesk aña 2017 cu e meta pa facilita empresanan chikito y mediano cu tur informacion necesario y asistencia pa ora nan kier exporta nan producto of servicio. For di e tempo ey hopi a cambia y economia di Aruba a conoce un transformacion pa reposiciona e isla chikito aki den un mundo post-Covid. Un transformacion cu ta implica di pasa pa un sector economico principal pa un economia resiliente cu varios oportunidad y un economia habri cu ta exporta pa henter mundo. Pa por tin exito den e transformacion, nos mester innova, fortalece nos negoshinan y consolida nos exportacionan.

Partnershipnan internacional

Pa logra e transformacion aki, Exprodesk a bin ta lidera proyectonan cu exportadonan potencial cu partnership cu ta varia di Rijksdienst voor Ondernemend Nederland, Holland House Colombia, Caribbean Export Development, programa COSME y e cuidad Doral, Florida. E partnershipnan aki a yuda apoya e exportado local riba diferente nivel. Pronto Exprodesk lo tin mas partnership y instrumento pa yuda nos negoshinan yega na nan mercado pa exporta y pa por sigui crece.

Nos productonan y servicionan tin balor

Exprodesk ta presenta ‘Export Week – Conquering New Horizons’Historicamente economia di Aruba tabata un economia habri cu partnernan di comercio internacional. Sinembargo e hacimento di negoshi tabata di un banda so: importacion pa Aruba. Ta hopi importante si nos por transforma esaki y conkista horizontenan nobo pa Aruba. Siman pasa durante di e cumbre di Aruba Investment Summit Aruba Royal Aloe, e exportado number uno di Aruba a comparti su strategia pa internacionalisa. Durante e presentacion Royal Aruba Aloe a afirma cu nos producto y servicionanan tin balor pa ofrece na henter mundo..

Export Week ta hopi importante

Pa compromete pa exporta no ta nada facil, e por resulta hopi trabou y caro. Pesey e ‘Export Week’ aki ta hopi importante. E oradonan lo comparti nan conocemento y lo empodera e participantenan pa ta exitoso. Alabes esaki ta un momento cu e negoshinan y e grupo di interes por uni virtualmente. Tambe tin oportunidad pa e participantenan network durante e transcurso di siman.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options