Malestar gastro-intestinal ta ocasiona diarea cu por bin acompaña cu sacamento y ta ocasiona pa un virus, bacteria of parasito.
Transmision di e microorganismo ta sosode di hende pa hende pa medio di contacto. Esaki ta sosode na momento cu un persona infecta bay wc y no laba su man debidamente.
Tambe transmision por sosode na momento cu un dunado di cuido cambia un pampers of duna asistencia na un persona of mucha cu a saca y tampoco laba su man debidamente cu awa y habon. Di e forma aki e persona afecta of e dunado di cuido ta transmiti e microorganismo pa un otro superficie caminda otro persona ta bin den contacto cu esaki y a traves di su boca e microorganismo ta drenta su sistema. Na momento cu e microorganismo drenta su sistema e por ocasiona dolor di bariga, keintura, diarea y sacamento. Den caso extremo of cerca mucha e persona por hasta deshidrata debi na cantidad grandi di likido cu ta perde door di keintura, sacamento y diarea.
Pa evita transmision di malesa gastro-intestinal ta importante pa pone extra atencion na nos higiena di man. Laba man cu awa y habon prome cu come, despues di bay wc y durante cualkier ora di dia ta yuda minimalisa e riesgo pa sigui transmiti e malesa. Desinfecta superficienan cu e persona infecta ta uza (wc, man di porta di baño, unda cu e persona por a mishi).
Na momento cu un persona tin diarea of tin sacamento ta importante pa:
- Evita di bay trabao of di hiba un mucha malo scol of crèche;
- vigila e persona bon pa evita deshidratacion, specialmente mucha y adulto mayor;
- percura pa e persona/mucha bebe hopi likido, por ehempel awa, juice di appel, sopi bouillon, pedialite y mas. Si e persona no tin apetit pa come ta importante pa e bebe hopi likido;
- vigila e persona su temperatura, si esaki subi riba 38°C consulta cu dokter di cas pa conseho.
Pa mas informacion like nos Facebook page Directie Volksgezondheid DVG Aruba, Follow DVG riba Instagram directie_volksgezondheid_aruba, subi www.dvg.aw, yama 5224200 of manda email na servicio@dvg.aw.
Share this page