Ampliacion di e canasta basico

E canasta basico ta contene productonan cu ta considera di prome necesidad y di cual e prijsnan ta regula door di pone un prijs maximo di benta cu ta inclui margenan fiho di ganashi pa bendedornan di e productonan aki. Si e nivel di prijsnan di productonan ta afecta e bienestar general, por tuma e decision cu lo regula e prijsnan di e productonan aki.

Departamento di Asunto Economico, Comercio y Industria ta e instancia  cu ta calcula e prijsnan di e productonan den e canasta basico. Cambio den prijs di benta di productonan den e canasta basico, ta determina tambe door di desaroyo internacional di prijs di petroleo y productonan.

Actualmente e canasta basico ta consisti di 1205 producto di diferente marca y contenido. Despues di a ricibi conseho di Sociaal- Economische Raad, Departamento di Salubridad Publico, y Departamento di Asuntonan Economico, Comercio y Industria, Minister Geoffrey Wever a cuminsa e trayectoria huridico pa ampliacion di e canasta basico cu e siguiente 5 producto: galiña henter congela, cornflakes (teniendo na cuanto cu lechi polvo tambe ta forma parti di e canasta basico y balor nutritutivo di esaki), pindakaas, frutanan seco y congela, y pampers.

Pa mas informacion over di e canasta basico actual ta invita tur consumidor pa descarga e aplicacion “Control di Prijs” obtenibel riba Google Play y App Store.