Nos ta den un periodo hopi gusta pa nos comunidad: Siman Santo.Siman Santo ta un siman cu hopi actividad, caminda hopi famia ta sali core rond, bay lama of ta campa. Pa haci e siman aki uno agradabel y sin peliger, mester ta consciente di algun aspecto importante.
Un di e factornan cu mester di extra atencion ta solo. Uza sunblock SPF 30 of mas y re-aplica cada 2 ora, pa evita asina cancer di cuero cu ta lamentabelmente hopi comun na Aruba. Sinta den areanan cu por ofrece sombra, pa asina solo no cay directamente ariba bo cuero. No solamente solo por ta peligroso, pero tambe e temperatura halto, dus tene e curpa bon hidrata. Bebe hopi awa of bebidanan saludabel cu no ta contene hopi sucu, tampoco hopi alcohol.
Pa loke ta cuminda, mantene alimentonan bon tapa/separa y na e temperatura adecua; esaki pa evita contaminacion di alimento y intoxicacion. Laba man prome y despues di come. Mester piki tur desperdicio y benta afo corectamente pa evita propagacion di bacteria y insectonan indesea.
Den e temporada aki tin hopi biento cual lo por ocasiona olanan grandi cu por ta hopi peligroso. Sea extra atento cu e muchanan, no laga nan sin supervision na ningun momento.
Tocante droga y alcohol, ta importante pa papia cu e mucha/hobennan y educa nan pa no tuma nada di come of bebe for di niun hende cu no ta famia, hopi hende desconoci ta cana rond. Evita alcohol, pero si bo ta bay bebe, haci’e cu moderacion.
Esakinan ta algun tip di Departamento di Salud Publico Aruba cu ta desea comunidad un dushi Siman Santo!
Share this page