Algemene Rekenkamer ta publica su rapport tocante cuenta anual di pais Aruba (Pais)di aña 2014. No bisa so, pero haci tambe

Den e rapport aki Algemene Rekenkamer ta remarca cu, mirando e deficit acumulativo cu ta creciendo y un debe nacional cu ta sigui subi, aña 2014 a para den marco di preocupacion continuo tocante e sostenibilidad di finansas publico. Ademas di esaki, durante e aprobacion di presupuesto a surgi un situacion door di cual e presupuesto di aña 2014 a drenta na vigor practicamente na final di aña.

Palabracion y realisacion di esaki

Na aña 2014 gobierno a presenta un cambio den su maneho presupuestario y a palabra pa haci e finansas publico duradero y pa riba termino, yega na un presupuesto balansa. Pa por cumpli cu e normanan presupuestario cu a palabra, gobierno a presenta un marco financiero pa añanan 2014-2018. E investigacion di Algemene Rekenkamer ta indica cu ainda gobierno no ta cumpli cu palabracionnan di e normanan di e presupuesto. Ademas di esaki e marco financiero ta wordo ahusta pa despues toch wordo surpasa. Ta di suma importancia pa gobierno bay over na un control efectivo riba gastonan, pa asina por logra e metanan cu gobierno a presenta pa e añanan venidero. Ta hopi importante pa no lag’e solamente na palabra, pero pa cumpli tambe cu locual a wordo palabra. Den poco palabra, no bisa so, pero haci tambe.

Durante aña 2014 pa prome biaha cifranan periodico di e realisacion di presupuesto a wordo compila. Cifranan periodico por duna e ministernan y Parlamento un guia, pa asina preveni cu e palabracionnan no wordo cumpli. Un condicion ta cu e cifranan periodico ta disponibel na tempo y cu tin garantia cu e cifranan ta di confia. Pa e motibo ey tambe e mehoracion di e maneho financiero ta un necesidad. Pa aña 2014 e maneho financiero a conoce poco mehoracion cu por wordo midi. Un desaroyo positivo ta cu na maart 2015 gobierno a entrega un plan di accion encuanto mehoracion di maneho financiero na Parlamento. Tambe a haci un evaluacion inicial di e situacion actual di e maneho financiero. Ta di suma importancia pa duna ehecucion rapido na mehoracion di maneho financiero, mirando cu esaki ta forma e base pa logra haci e finansas publico di Pais uno sostenibel.

Derecho presupuestario di Parlamento

Mirando e entregamento laat di e presupuesto di 2014, articulo 11 di e ley di Comptabilidad di 1989 a wordo aplica pa asina por sigura e continuacion di e servicio di e instancianan gubernamental. E interpretacion y aplicacion amplio cu e gobierno ta duna na e articulo aki, lamentablemente ta mustra e forma con e derecho presupuestario di Parlamento den gran parti ta wordo hala un banda. Algemene Rekenkamer ta ripiti su preocupacionnan riba e forma di procede aki y ta remarca cu Parlamento tambe tin un responsabilidad pa percura cu e proceduranan cu e derecho presupuestario ta contrae, wordo cumpli.

Recomendacionnan Algemene Rekenkamer

Algemene Rekenkamer ta indica den su rapport cu gobierno mester continua cu plannan pa drecha y mehora e maneho financiero. Trayectonan cu ya ta andando mester wordo continua. Un ehempel ta e cambio di ley di Comptabilidad. E finalisacion rapido di e trayectorio di e ley aki ta un necesidad. Un otro punto importante ta pa yega na establece normanan pa compilacion di e cuenta anual. Esaki lo conduci na e hecho cu den futuro por yega na realisa control debido di e cuenta anual.

Durante e preparacion y ehecucion di e presupuesto mester pone enfasis riba e maneho di e gastonan pa asina por cumpli cu e normanan cu a wordo palabra. Ta hopi importante pa cumpli cu stipulacionnan di ley, tambe transparencia den direccion di Parlamento, ta un rekisito. Algemene Rekenkamer ta urgi minister di Finansas pa percura pa esaki sosode. Algemene Rekenkamer ta recomenda Parlamento pa tuma medidanan pa pone un paro na e manera con e derecho presupuestario di Parlamento ta wordo afecta den un forma negativo. Mester vigila pa palabracionnan wordo cumpli. Aki mester haci uzo di e posibilidad constitucional pa laga minister(nan) concerni responsabilisa nan mes ora di no cumpli cu leynan y palabracionnan haci. E posibilidad pa impone sancion no mester wordo descarta.

Reaccion di minister di Finansas

Minister di Finansas a reacciona riba e rapport di Algemene Rekenkamer y ta di acuerdo cu mester cumpli cu palabracionnan haci. Minister a indica den su carta cu e ta dispuesto pa pone su mes disponibel pa por logra esey. Algemene Rekenkamer lo sigui e siguiente pasonan di gobierno.

E Por download e rapport of por pidi'e na telefon 582-5448, of via e-mail na info@rekenkamer.aw .