AHATA ta introduci serie 2 di su campaña di conscientisacion ‘Ami Ta Turismo’

Riba 4 di januari, Minister di Turismo y Salud Publico sr. Dangui Oduber a reuni cu CEO di AHATA sra. Tisa La Sorte pa dialoga tocante e di dos serie di e campaña di conscientisacion aki. 

Tambe durante e encuentro aki a intercambia riba pensamento con e aña 2022 a bay pa cu turismo. A papia riba kico ta e proyeccionnan cu tin pa aña 2023 y e retonan di mas grandi cu e sector tin pa e aña aki.

Serie 2 di e campaña ta consisti di nuebe video di diferente hoben profesional den hospitalidad, y cada un ta describi e importancia di su trabao. AHATA ta considera e persona nan aki como embahador di nos industria turistico; e pilar di nos economia.

E videonan ta ilustra e diversidad di trabao y personanan den e sector, y con pasion y dedicacion di cada empleado ta representa Aruba su producto turistico cu ta reconoci mundialmente. E comunidad por ta orguyoso di e miles di persona cu ta brinda servicio na nos bishitantenan, y p’esey a scoge e nomber ‘Ami Ta Turismo’.

Diabierna awo, lo cuminsa introduci un “embahador” riba AHATA su plataformanan social diariamente. Cu e campaña aki AHATA ta spera di por crea mas conocemento di e industria y di inspira mas persona pa realisa un carera den nos industria turistico.

Pa e motivo aki, gobierno ta sostene e campaña di conscientisacion inicia pa AHATA.

Minister Dangui Oduber ta gradici sra. La Sorte pa e encuentro aki y ta pidi henter comunidad pa wak e programa interesante aki caminda ta bay comparti cu comunidad tur e oportunidadnan cu nos industria di turismo tin pa ofrece.