Adultonan hoben na nos isla, piesa clave den nos recuperacion

ORANJESTAD – Si bo ta den e grupo di 26-40 aña, Departamento di Salud Publico lo considera bo como un adulto hoben.

E segmento di nos poblacion aki, ta keda un piesa clave den e recuperacion di nos isla.

Ad Adulto hobenComo adulto hoben, bo mester keda responsabel y mustra e determinacion pa caba cu Covid-19 na Aruba.

Departamento di Salud Publico ta haci un yamado na e segmento di adulto hoben den nos comunidad, pa asina e grupo aki bira un modelo pa sigui.

Covid-19 a cambia nos manera di biba, di traha y di interactua. E adultonan hoben na nos isla mester enfoca ariba nan bienestar, concentra den cuida nan mes, pa asina nan por yuda cuida otro.

Pa logra un bon salud mester: come alimento saludabel y bebe hopi likido, haci actividad fisico (minimo 30 minuut pa dia), reduci consumo di alcohol y humamento, drumi por lo menos 7 ora pa anochi, pensa positivo, maneha stress y practica higiena (sigui tur protocol stipula).

Como Departamento di Salud Publico, nos ta consciente di e necesidad pa socialisa di e grupo aki di nos poblacion, pero mester socialisa cu precaucion. Ta hopi importante pa mantene distancia di 1.5M na tur actividad social. Semper mester evita contacto fisico y evita aglomeracion. Mester uza tapa boca den tur luga cera (bisti esaki di e manera corecto). Relaha y kita stress ta necesario, pero na un manera responsabel, cumpliendo cu tur regla.

Purba hiba un rutina normal memei di e circunstancia. Trata na realisa tur bo actividadnan mas normal cu bo por, cumpliendo cu e protocolnan di higiena y siguridad. Sigui bo rutina familiar ta trece stabilidad y trankilidad den e hogar. Cuida cada miembro di famia, sea alerta pa sintoma di Covid-19. Si bo tin sintoma, keda cas, no sali, ni pa bay traha.

 Pa nos sigui bringa e Covid-19, mester sigui tur regla y recomendacion stipula. Nos tur mester ta determina pa enfrenta tur reto. Ban sigui cuida!

#ArubaTaContaCuBo
#DVGAruba

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options