Esaki ta den cuadro di e meta di Gobierno di Aruba pa baha gasto di personal. Pa e trabou por ta efectivo ta necesario pa tin un bista cla riba cua ta e factornan cu ta contribui na e gastonan di personal. Banda di overtime, un factor cu ta hisa gasto di personal di Gobierno ta absentismo bou di e trahador publico.
Den cuadro di esaki Minister Ruiz-Maduro a haya un presentacion di e director di Banco di Seguro Social, Sr. Edwin Jacobs, hunto cu Dr. Genser p’asina por haya un bista di e absentismo den sector publico y cuanto esaki ta contribui na e gastonan di personal di Gobierno.
Den nan presentación, SVb a haci comparacion di varios indicador di absentismo den sector publico y sector priva y a analisa e porcentahe di absentismo di algun departamento grandi di Gobierno. Tambe a analisa cuanto e absentismo laboral ta costa sector publico y sector priva.
Den e lista adhunto por wak e comparacion di absentismo entre e trahado publico y e trahado den sector priva.
| 2018 Comparacion entre e trahado publico y e e trahado den sector priva |
||
|---|---|---|
| Empleado publico | Empleado den sector priva | |
| Cantidad di empleado | 4534 (sin personal di educacion) | 42735 empleado priva registra na SVb |
| Notificacion di absentismo (AO) | 5 biaha | 1.3 biaha |
| Duracion AO | 9 dia | 5 dia |
| Porcentahe absentismo | 8.6% | 2.9% |
| Gasto anual | 62,8 miyon florin | 32,8 miyon florin |
| Gasto promedio pa empleado | 7233 florin | 1470 florin |
Den e presentacion tambe e ehecutivonan di SVb a presenta e posibel solucion pa baha e absentismo den sector publico. Dentro di poco SVb lo haci e presentacion aki na Conseho di Minister. Despues lo sigui reunionnan cu mas departamento den diferente Ministerio p’asina hunto logra atende y yega na solucion factibel pa baha e gastonan di personal relaciona cu absentismo di personal di Gobierno di Aruba.
Share this page