Artopia y AAA recientemente a firma un acuerdo pa inicia e proceso artistico y creativo pa un diseño ideal di un escultura cu lo captura e momento memorabel aki. E escultura lo refleha evolucion di aviacion durante su 100 aña di historia y lo inclui un aspecto historico, actual y futuristico. Den e bunita obra di arte aki lo refleha e aspecto dinamico di e industria di aviacion. E lo ta un obra di arte publico pa tur local y bishitante por aprecia.
Ainda no a determina e ubicacion exacto di e escultura aki. Su ubicacion tambe ta forma parti di e historia tocante di e escultura cu lo ta diseña y produci pa Artopia cu aporte financiero di AAA.
“Conmemora e acontecimento historico den e historia di Aruba, pa medio di un bunita arte publico cu lo conta e historia di aviacion di Aruba, ta nos regalo pa henter comunidad di Aruba. E obra di arte publico aki lo agrega un balor enorme na e forsa cultural, lo ta agradabel desde e punto di bista estetico y lo agrega un balor economico na nos comunidad local. Como un arte publico, e escultura aki lo contribui na e identidad di Aruba, lo impulsa e orguyo di nos comunidad pa cu e 100 aniversario di aviacion na Aruba, como tambe lo duna un sentido cu ta pertenece na e celebracion”, asina Joost Meijs, CEO di AAA, a duna di conoce.
E escultura lo ta cla den algun luna y lo ta inaugur’e riba 18 di augustus 2023. Riba e fecha aki ta celebra oficialmente e 100 aña di aviacion na Aruba, despues cu e prome avion a baha na aña 1923, den lama na Paardenbaai.
Share this page