E proyecto aki a keda financia pa Aruba Tourism Authority (ATA).
Algun siman atras e compania di Varadero a entrega e proyecto, awor nos boeinan ta den bon estado. E proyecto aki tabata importante den e cuadro di mehoracion di e producto Aruba.
Den e proyecto aki a percura pa duna mas seguridad na e landadonan cu ta haci uzo di nos lamanan,. E areanan cu a haya boei ta, e area di Arashi, Malmok, Tres trapi, Palm Beach y Costa Linda. Den e proyecto aki a pone boei nobo unda cu no tin boei ainda. Caminda cu ya tin boei caba a scapa mastanto boei posibel por medio di repara y a reemplasa esnan cu no por a drecha cu boeinan nobo.
E maneho di gobierno ta riba turista di calidad, cu ta laga mas hopi placa den Aruba su economia. Pesey lo bay enfoca pa riba e perfil di turista di “High Value Low Impact Tourism”. Esaki ta e turista cu ta gana mas di 150 mil dollar pa aña y ta respeta Aruba su naturalesa como tambe nos balornan cultural.
Lo bay sigui inverti pa mehora e producto Aruba pa asina pa por duna un mihor experencia posibel na nos bishitantenan. Actualmente tin e proyecto di Baby Beach Promenade y tambe e proyecto di trapi na Rodgers beach cu ta den pleno ehecucion. Na cuminsamento di aña a anuncia cu pronto lo bay cuminsa cu fase 3 di e proyecto di Boardwalk Malmok.
Minister Oduber kier a gradici ATA pa pone e fondonan disponibel pa asina haci e proyecto aki un realidad. Aruba su turismo ta progresando, pronto Aruba lo yega 100% di recuperacion, turismo ta keda e driver di nos economia.
Share this page