E MOU aki ta habri e posibilidad pa sondea e posibilidad pa e ex edificio di DOW bira e oficina principal di APA y un Visitor Inspiration Center di ATA. Minister Oduber a duna di conoce cu e proceso aki tabata uno cu a tuma su tempo y pesey e ta considera esaki uno hopi special.
APA ta tuma e ex edificio di DOW over, renoba esaki completo y lo comparti e edificio cu ATA. Piso 2 lo bira oficina prinicipal di APA mientras Aruba Tourism Authority (ATA) lo bay huur piso 1 y converti esaki den un Visitor Inspiration Center pa brinda informacion na nos bishitantenan, inspira nan y tambe atende cu nos turistanan crucero.
Gobierno su vision y maneho den turismo ta basa riba keda haci inversion den producto Aruba, stimula economia y crea oportunidad nobo pa nos comunidad. Aruba ta un bon producto y di calidad y pa mantene nos mes competitivo ta importante pa keda inverti den nos producto.
Minister Oduber ta contento cu despues di un proceso largo porfin ta logra yega na un acuerdo. Dia 14 di maart 2023 conhuntamente cu Director di APA, CEO di ATA, DOW y Monumentenbureau a haci un recorido den e ex edificio di DOW y inspecciona e estado di e edificio. Cu e MOU firma ta bay renoba un edificio monumental despues cu esaki a para 15 aña bandona den nos centro di cuidad.
Minister Dangui Oduber a gradici APA NV y ATA cu hunto lo bay realisa e bunita proyecto aki cu nos tur por ta orguyoso di dje.
Share this page