A firma MoU di colaboracion pa energia renobabel

Pa e conferencia CCEC, varios organisacion, isla y pais Caribense y di rond mundo ta presente pa promove colaboracion riba accion climatologico entre islanan chikito na nivel global. Algun tema cu ta trata den e conferencia ta: transicion di energia inclusivo y e financiamento pa realisa e plannan aki.

Durante e conferencia Hulanda ta firma un Memorandum of Understanding (MoU) cu Sint Maarten y Aruba. E colaboracion ta enfoca riba diferente tecnologia di energia renobabel, entre otro energia di biento, hidrogeno, solar y con ta warda energia ‘energy storage’.

Ademas, a acorda intercambio di personal y di conocemento cientifico y tecnologico, y e organisacion di entre otro gruponan di trabao y proyectonan di investigacion.

Minister di Clima y Energia di Hulanda sr. Rob Jetten a expresa:

‘Islanan awor ta na e frontline pa cambio di clima. Si nos no tuma accion, e consecuencianan cada bes lo aumenta y posiblemente bira ireversibel. Pa e motibo aki, kier percura cu islanan manera Aruba y Sint Maarten no ta keda atras den e transicion pa energia renobabel. Esaki tambe ta importante den cuadro di husticia climatologico (Climate Justice).’

Prome Minister di Sint Maarten Silveria Jacobs a bisa cu e ta importante forma parti di e discusion relaciona cu energia renobabel y desaroyo sostenibel. Cu e MoU tur cos ta cla pa realisa e avansenan den direccion di sostenibilidad y transicion di energia renobabel cu Sint Maarten ta anhela.

Prome Minister Evelyn Wever - Croes a enfatisa cu Aruba ta recuperando for di e pandemia di Covid-19 cu un economia mas fuerte y resiliente. Den cuadro di esaki energia lo bira un pilar economico importante. Tin hopi oportunidad pa Aruba mes, pero tambe oportunidad como partner den Reino. E MoU ta importante, pasobra si kier trece cambio berdadero, mester haci esaki hunto.