A cuminsa evalua e “exit strategy” di e pandemia

E plan ta carga e nomber di “exit strategy”. E “exit strategy” aki ta pa bolbe bek na normalidad cu tur precaucion y risiconan calcula. Minister Oduber ta convenci cu Aruba tin diferente instrumento den su poder pa por maneha e crisis y esaki ta haci cu pronto por cuminsa midi e crisis aki na un otro manera.

Durante henter e crisis a purba crea e balansa entre salud y economia pero poniendo e salud semper na prome lugar. Esaki no lo bay cambia pero awor lo bay evalua otro modelonan tambe. Por ehempel mester bay evalua modelonan economico, laboral, financiero y cultural. Na Hulanda tambe e Minister nobo di Salud Publico Sr. Kuipers a menciona cu mester bin cu otro manera pa enfrenta e crisis.

Exit Strategy plan ta encera:

1. Cuminsa habri e discusion pa por declara e virus aki endemico. E virus a muteer hopi. E ultimo variante ta menos fuerte y ta pesey nos tambe mester considera declara e pandemia endemico.
2. Expande e capacidad di nos ICU na 16 cama y cu e personal necesario. Personal di “AMI Expeditionaly Healthcare” ta hopi costoso pa Aruba y tambe pa Hulanda. Pa es motibo riba nos propio forsa nos kier percura pa expande capacidad di ICU. E testing a genera hopi entrada pa LabHOH y AZV, pa e motibo aki AZV a bay di acuerdo pa pone 2.4 miyon florin disponibel pa busca mas personal riba propio forsa y expande nos capacidad na ICU.
3. Elimina seguro obligatorio na airport y introduci un heffing cu lo ta specialmente pa genera entrada pa inverti bek den cuido.
4. Lo bay cambia e maneho di testing na aeropuerto y tambe e maneho di testing pa localnan. Pa e turista lo bay flexibilisa e maneho di entrada caminda entrante 18 di januari a cuminsa acepta anti gen testing cu ta mas economico y a cambia e PCR testing di 24 pa 48 ora prome cu e vuelo pa Aruba. Pa e localnan lo bay cambia e manera di test manera e ta awor. Esaki ta debi cu e manera actual ya no ta dunando e efectividad y e no ta sostenibel mas mirando cu e variante aki ta mucho mas contagioso. Ta bay introduci un maneho di test nobo cu ta e sentinel testing. Esaki ta nifica cu dokternan di cas ta bay haci invitacion selectivo na diferente persona pa bin haci test pa haya un indicacion con e virus ta plama den comunidad.
5. Sigui focus riba booster y vacuna. E vacuna a duna resultado cu nos tawata buscando y pesey lo bay sigui recomenda esaki. Durante e peak den e di 4 ola tabata tin 116 persona interna den hospital y 82% di esnan interna NO tabata ta vacuna.
6. Ta bay reenforsa Departamento di Salud Publico.
7. Lo bay elimina tur medida y habri Aruba por completo.

Minister Oduber a remarca cu Aruba ta pasando den su di 5 ola di COVID-19, e posibilidad ta cu nos por sigui haya diferente otro variante. Aruba mester simplemente siña biba cu e virus paso porta e no ta bay stop di existi.