Lo aloca e fondonan aki pa stichting Fundacion pa Maneho di Addicion di Aruba (FMAA), muy pronto Stichting Hunto, hunto cu Sociaal Psychiatrische Dienst (SPD), pa por ehecuta e proyecto aki pa na un manera responsabel y integral por atende cu e fenomeno di adictonan ambulante riba caya.
E proyecto di “bemoeizorg” ta forma parti di e “meerjarenbeleidsplan” di Ministerio di Husticia y Asuntonan Social. E proyect aki, cu a anuncia na final di 2021, na tratamento di presupuesto 2022, ta encera cu lo atende adictonan ambulante na un manera pro-activo riba caya. A aloca fondonan cu a wordo aproba pa aña 2022, pues prome di september e ekipo di profesionalnan lo mester inicia nan trabounan. Na mes momento, e aprobacion aki ta encera cu lo sigui uza e fondonan aki den aña 2023. E plan ta pa na aña 2024 Stichting Hunto mes, haci e peticion a base di nan subsidio regular, pa sigui atende cu e fenomeno aki.
Pa loke ta e fondonan, esaki ta nifica cu por bay emplea cinco profesional full time, pa atende cu e proyecto aki so. Na un manera proactivo ta bay acerca e adictonan ambulante y percura ubica pa nan den un di e centronan. Na inicio esaki lo bay ta na e centro na Meiveld. Sinembargo, den cuadro di e proyecto aki mes, a aloca 100 mil florin pa por renoba cuater camber na Centro Colorado. Cuatro camber ta nifica 16 pa 24 cama, caminda e adictonan aki por haya e ayudo y e cuido necesario. Banda di esaki, mester tene cuenta tambe cu diferente otro aspecto ora ta kita un persona for di caya. Ta importante pa brinda e persona aki e cuido cu e tin mester di dje, pero di otro banda tambe, tin cu tene cuenta e aspecto di cuminda y aspectonan basico cu nan tin mester di dje. Pues, den cuadro di e proyecto aki, a tene cuenta cu tur e fondonan aki, manera a menciona pa asina por atende cu e fenomeno aki na un manera duradero y structural.
Manera ta conoci tin un vision a largo plaso, cual ta un aspecto cu e stuurgroep GGZ (Geestelijke Gezondgeidszorg) hunto cu Pan American Health Organisation (PAHO) a yega na dje. Sinembargo, banda di esaki tin visionnan a corto plaso y a medio largo plaso, for di cual e tipo di proyectonan asina aki ta nace for di dje. Riba 17 di augustus 2022, a tuma luga ponemento di e prome piedra di Stichting Hunto, caminda ta bay ubica SPD y FMAA den un solo edificio. Asina e procesonan por ta miho alinea na otro pa brinda un miho cuido na tur esnan cu tin mester di dje, no adultonan so, pero principalmente mucha- y hobennan.
Minister di Husticia y Asuntonan Social Rocco Tjon ta gradici tur e profesionalnan di e stuurgroep GGZ. Manera ta conoci desaroyonan ta mustra cu mas y mas mester cera e “gap” entre e aspectonan di salud mental y di adiccion. Asina por tuma nota cu ora ta papia cu profesionalnan den e veld, mas y mas ta papia di un dubbele diagnostiek, pues e clientenan no tin retonan riba un tereno so, pero tambe riba tereno di salud mental. Pa e motibo aki, tur e proyectonan aki ta nace for di e stuurgroep GGZ.
Door di atende cu adictonan ambulante, principalmente den nos centro di ciudad, lo eleva asina e siguridad, pero tambe baha e molester pa tur esnan cu ta bishita nos centronan, creando un miho “straatbeeld”.
Share this page