ORANJESTAD – Un fenomeno cu ta birando mas y mas popular cerca turistanan rond mundo ta "vacation rentals". 

Na Aruba esaki tambe ta e caso y e ultimo añanan por a nota un aumento drastico di vacation rentals cu ta ofrece tur rond di Aruba.

Segun raport di Aruba Tourism Authority, na Aruba mas o menos 30% di nos bishitantenan ta scoge pa e tipo di acomodacion aki.
Ministerio di Turismo y Salud Publico  ta di opinion cu ta hopi importante pa bin cu regulacion pa vacation rentals y asina crea un "level playing field" y mantene e calidad cu ta ofrece na Aruba. Gobierno kier regula esaki a base di un registracion, den cual tur propietario cu tin un “listing” mester ta registra pa por opera nan vacation rental.

E proceso di independisacion di e unidad di Dienst Warenkeuring en Hygiene (DWH) cu actualmente ta parti di DVG ta andando y e ley ya ta den su fase final pa bay Raad van Advies. E unidad aki lo bira un Sui Generis y lo keda encarga cu henter e proceso di dunamento di permiso y haci e controlnan necesario pa mantene e calidad di nos producto Aruba. Control lo tuma luga pa cu aspecto di higiena y pa siguridad. Tambe ta den proceso pa digitalisa ful e proceso di duna permiso di horeca.

Ademas di crea igualdad den e operacion di esnan cu ta huur acomodacion, e regulacion lo yuda cu e cumplimento di impuestonan relevante den e mercado aki manera e “Tourism Levy”. 

E ley y maneho aki ta conta cu sosten di e departamentonan envolvi cu ta participando activamente den e proceso pa crea e regulacion pa vacation rentals.